"Milli Məclisdə müxalifəti təmsil edən deputatların yeni birliyinin yaradılması istiqamətində danışıqlar gedir." Müxalifətyönlü Ümid Partiyasının sədri, millət vəkili İqbal Ağazadə Trend ə açıqlamasında belə deyib.
Xatırladaq ki, 2005-ci ilin parlament seçkilərindən sonra müxalifəti təmsil edən millət vəkilləri Milli Məclisdə iki deputat qrupu - Müsavat və Müxalifə deputat qrupu yaradıblar.
İ.Ağazadə bildirib ki, parlamentdəki deputat qruplarının səmərəli fəaliyyət göstərməsi imkanları çox azdır: "Çünki bizim gündəliyə məsələ daxil etmək, hər hansı bir məsələnin kollektiv müzakirəsini tələb etmək imkanlarımız yoxdur. Daxili prosedur qaydalar buna imkan vermir. Müxalifətin ayrı-ayrı qruplara bölünməsi də buna əngəl törədir", - deyə Ümid Partiyasının sədri qeyd edib.
Onun sözlərinə görə, Müsavat və müxalifət deputat qruplarının əlaqələndirilmiş şəkildə fəaliyyət göstərməsi üçün danışıqlar gedir: "Çalışacağıq ki, maraqlarımızın üst-üstə düşdüyü məsələri parlamentdə qaldırmaq və onların müzakirəsinə nail olmaq üçün bir yol tapaq. Fevral ayına qədər bu məsələni tənzimləmək istəyirik."
Partiya sədri onu da əlavə edib ki, Milli Məclisdə müxalifəti təmsil edən millət vəkillərindən kiminsə yeni yaradılacaq qrupdan kənarda qalması mümkündür. "Biz onları məcbur etməyəcəyik. Çünki bir yerdə fəaliyyət göstərmək istəyən kifayət qədər adam var", - deyə deputat vurğulayıb.
Qeyd edək ki, müxalifətyönlü Ümid Partiyası 2002-ci ildə yaradılıb. Partiyanın sədri millət vəkili İqbal Ağazadədir.
