Bir qrup QHT-nin Tarif şurasının enerji daşayıcılarının, kommunal və bir sıra xidmətlərin qiymətlərinin artırılmasına etiraz əlaməti olaraq təşkil etmək istədiyi mitinq baş tutmadı. Bu haqda məlumatı Trendə Helsinki Vətəndaş Assambleyasının Gəncə şəhər nümayəndəliyinin rəhbəri Akifə Əliyeva verib.
Müsahibin sözlərinə görə mitinqin keçirilməsi üçün yerin ayrılması məqsədilə Gəncə şəhər İcra Hakimiyyətinə edilən müraciətə bu gün cavab gəlib.
"Cavabda bildirilib ki, bizim mitinq keçirilməsi üçün təklif etdiyimiz Nizami kinoteatrının qarşısı və Heydər Əliyev meydanı şəhər əhalisinin istirahət etdiyi ərazilər olduğundan, orada toplantı keçirilməsi məqsədə uyğun hesab edilməyib. Müraciəti şəhər İcra Hakimiyyəti başçısının humanitar məsələlər üzrə müavini Akif Ələkbərov cavablandırıb"
Qeyd edək ki, 500-dək insanın iştirakı gözlənilən mitinqin keçirilməsi yanvarın 24-ə planlaşdırılımışdı. Bu məqsədə yer ayrılması üçün şəhər İcra Hakimiyyətinə ötən həftədən müraciət edilsə də, məktuba cavab bu gün gəlib.
