Böyük Quruluş Partiyası (BQP) Dövlət Əmlakının İdarə Edilməsi üzrə Dövlət Komitəsinin qərargah üçün ona təklif etdiyi 8-ci mikrorayonun ərazisindəki yerə köçməyəcək. Bu barədə Trend ə partiyanın sədri Fazil Qəzənfəroğlu məlumat verib.
O bildirib ki, BQP qərargahla təmin olunması üçün Dövlət Əmlakının İdarə Edilməsi üzrə Dövlət Komitəsinə müraciət edib. Dövlət Komitəsi partiyaya Binəqədi rayonu, 8-ci mikrorayonda yerləşən Layihələşdirmə İnstitutunun 11-ci mərtəbəsində yer təklif edib. F.Qəzənfəroğlunun sözlərinə görə, həmin yer partiyanın normal fəaliyyət göstərməsi üçün tam əlverişsiz vəziyyətdədir: "Çoxmərtəbəli binanın sonuncu mərtəbəsində bizə təklif olunan yer tam təmirsiz, elektrik, istilik sistemləri olmayan, yararsız bir sahədir. Həmin yeri normal vəziyyətə gətirmək, təmir etmək üçün külli miqdarda vəsait lazımdır. Partiyanın isə həm belə bir vəsaiti yoxdur, həm də özümüzə məxsus olmayan obyektə bu qədər xərc çəkmək bizim üçün əlverişsizdir. Ona görə də təklif olunan yerdən imtina etmişik"-deyə partiya sədri qeyd edib.
