Azərbaycan, Bakı / Trend müxbir S.İlhamqızı/ Azərbaycan Liberal Partiyası (ALP) ADP-nin "Azadlıq" blokundakı müttəfiqləri qarşısında götürdüyü öhdəliklərini pozması və blokun vahid siyasi xəttinə zidd fəaliyyətini pisləyib. Bu fikirlər ALP-nin yaydığı bəyanatdandır.
ALP-nin İcraiyyə Komitəsinin martın 7-də keçirilən toplantısında ADP-nin yeni siyasi kurs götürməsi onun "Azadlıq" blokunun ümumi mövqeyinə zidd fəaliyyəti kimi qiymətləndirilib.
ADP-nin 9-cu qurultayına hazırlıq üzrə Təşkilat Komitəsinin sədri Sərdar Cəlaloğlu isə ADP-nin blok qarşısında heç bir öhdəliyi pozmadığını deyib. Onun sözlərinə görə, ADP-nin siyasi dialoq təklifi, yaxud etiraz aksiyaları ilə bağlı öz təklifləri heç də blokun mövqeyinə və öhdəliklərə zidd hərəkət deyil.
Qeyd edək ki, "Azadlıq" blokunda dörd müxalifət partiyası- Azərbaycan Xalq Cəbhəsi (AXCP), Liberal, Vətəndaş və İnkişaf (VİP), Azərbaycan Demokrat (ADP) partiyaları təmsil olunur. Lakin ADP-nin öz siyasi kursunda dəyişiklik etməsindən sonra "Azadlıq" blokunun həmsədrləri bu partiyanın blokda fəaliyyətinin dayandırılmasına qərar veriblər.