Azərbaycan, Bakı /müxbir Trend K. Zərbalıyeva/Millət vəkili Fəzail Ağamalı barəsində cinayət işi açılması üçün Respublika Prokurorluğuna müraciət olunub. Millət vəkili Hüseyn Abdullayevin vəkili Kamandar Nəsibov bazar ertəsi Trend ə açıqlamasında bildirib ki, vəsadətində Ağamalı barəsində Cinayət Məcəlləsinin 132-ci (döymə) və 221.2.2-ci (xuliqanlıq maddələri) ilə cinayət işi açılması, Abdullayev barəsindəki cinayət işinə xitam verilməsi və həbs qətimkan tədbirinin ləğv edilməsi xahiş olunur.
Vəkil Ağamalının şəxsiyyəti barəsində əldə etdikləri məlumatların da prokurorluğa gondərildiyini deyib.
Apellyasiya Məhkəməsi Abdullayevin Nəsimi rayon məhkəməsinin qərarından verdiyi şikayəti təmin etməyib və onun barəsində seçilmiş həbs qətimkan tədbirini qüvvədə saxlayıb.
Abdullayevin deputat toxunulmazlığı baş prokurorun təqdimatı ilə Milli Məclisin martın 19-da keçirilmiş fövqəladə iclasında ləğv olunub və həmin gün məhkəmənin qərarı ilə həbs edilib. Abdullayev hazırda Bayıldakı 1 saylı İstintaq Təcridxanasında saxlanılır. Barəsində Cinayət Məcəlləsinin 132-ci (döymə) və 221.2.2-ci (xuliqanlıq maddələri) ilə Baş Prokurorluğun Ağır Cinayətlərə Dair İşlər üzrə İstintaq İdarəsində cinayət işi açılıb və istintaq aparılır.
