Azərbaycan, Lənkəran / Trend müxbir P.Əliyeva/ Lənkəran şəhər Polis Şöbəsinin əməkdaşları tərəfindən Rusiyadan Lənkərana saxta dollar gətirən iki nəfər tutulub. Şöbədən cümə günü bildiriblər ki, Lənkəran rayonunun Şıxəkəran kənd sakini Ağakərim Ağayevə bir ədəd, Şağlaküçə kənd sakini İsmayıl Eyniyevə isə beş ədəd saxta 100 dollarlıq əskinaslar verilib, əvəzində milli pul alındıqdan sonra əməliyyat-axtarış tədbirlərinə başlanılıb.
Əməliyyat-axtarış tədbirləri zamanı 47 BA 327 dövlət nömrə nişanlı VAZ 2106 markalı avtomobildə olan 1985-ci il təvəllüdlü Əkbərov Elvin və 1978-ci il təvəllüdlü Əkbərov Bəxtiyarın üzərindən 1000 dollar saxta əskinas aşkarlanaraq götürülüb.
Məlum olub ki, hər ikisi Astaranın Kakalof kəndinin sakinləridir və qohumdurlar. Onlar ilkin izahatda bildiriblər ki, həmin pulları Rusiyanın Tümen vilayətində tikintidə işləyərkən qazanıblar.
Faktla bağlı Cinayət Məcəlləsinin 204-cü (pul və ya qiymətli kağızları hazırlama və ya satma) maddəsi ilə cinayət işi açılıb.