Azərbaycan, Bakı / Trend , müxbir E.Hüseynli/ Milli Qeyri-Hökumət Təşkilatları Forumunun prezidenti, deputat Azay Quliyev Azərbaycanda QHT fəaliyyətinin daha çevik, dəqiq və səmərəli tənzimlənməsinə yönəlmiş dörd qanun layihəsini Milli Məclisə təqdim edib. Bu barədə cümə axşamı forumun mətbuat xidmətindən məlumat verilib.
Təqdim olunan sənədlərdə "İctimai birliklər haqqında" qanuna əlavə və dəyişikliklər, "Fondlar haqqında", "Xeyriyyəçilik fəaliyyəti haqqında", "Könüllülük fəaliyyəti haqqında" yeni qanun layihələri var. Yeni qanun layihələrində vətəndaş cəmiyyətinin gücləndirilməsi, ictimai maraqların qorunması, QHT sistemində könüllülərin fəaliyyətinin hüquqi tənzimlənməsi məsələləri əksini tapıb.
Qanun layihələri Milli QHT Forumunun ekspertləri tərəfindən Qeyri-Kommersiya Hüququ üzrə Beynəlxalq Mərkəzin dəstəyi ilə hazırlanıb.
