Azərbaycan, Bakı, 10 yanvar /müx. TrendLife Eldar Hüseynzadə/
"İsmayıl Hidayətzadə" filmi "Azərbaycantelefilm" studiyasında lentə alınıb. Bu yaxınlarda isə həmin film AzTV-kanalında nümayiş etdiriləcək. Bu haqda TrendLife-a kinostudiyanın direktoru Vüqar Tapdıqoğlu xəbər verib. Adıçəkilən filmin rejissoru Ənvər Əbluc, ssenari müəllifi isə jurnalist Gülbəniz Hüseynovadır. İsmayıl Hidayətzadə kino və teatr sahəsində gördükləri işlərlə tanınıb. O, ilk səssiz Azərbaycan filmində çəkilib. Bundan əlavə, Üzeyir Hacıbəyovun yazdığı "Koroğlu" operasının rejissoru olub. Opera və Balet teatrının direktoru vəzifəsində çalışan İsmayıl Hidayətzadə ömrünün 50-ci ilində dünyasını dəyişib.