Azərbaycan, Lənkəran / Trend , müxbir P.Əliyeva/ Lənkəran rayonunda yanvar ayında 2 HİV-ə yoluxma faktı aşkarlanıb. Bu barədə çərşənbə günü Trend ə Lənkəran rayon Regional HİV Diaqnostikası Laboratoriyasının qrup rəhbəri Rəmiəli İbişov məlumat verib.
Ötən il rayonda 35 HİV-ə yoluxan xəstə qeydə alınıb, 8 nəfər QİCS-dən dünyasını dəyişib. Onlardan biri qadın, 7-si kişidir. Ümumilikdə isə Lənkəranda 118 QİCS xəstəsi qeydiyyatdadır. Onlardan 98-i kişi, 20-si qadındır. 71 nəfəri 31-50 yaş arasında olanlardır.
Ötən il Azərbaycanda 441 yeni HİV-ə yoluxma faktı qeydiyyata alınıb. Onlardan 437-si Azərbaycan vətəndaşı, 4 nəfəri xarici vətəndaşdır. Qeydiyyata alınan 437 Azərbaycan vətəndaşının 382 nəfəri (87,4%) kişi, 55 nəfəri (12,6%) qadındır. 2007-ci ildə HİV-ə yoluxanların əsas hissəsini - 271 nəfər (62,0%) inyeksion narkotiklərin istifadəçiləri təşkil edib. 2007-cı ildə AİDS-dən dünyasını dəyişmiş vətəndaşların sayı 48 nəfər olub.Ümumilikdə Respublika QİÇS-lə Mübarizə Mərkəzində 1987-2007-cı illər ərzində cəmi 1379 nəfər şəxsdə HİV-ə yoluxma faktı qeydə alınıb. Onlardan 59-u əcnəbi, 1320-i isə Azərbaycan vətəndaşıdır. HİV-ə yoluxmuş Azərbaycan vətəndaşlarından 1117-i (84,6%) kişi, 203-ü (15,4%) qadındır. AİDS-dən dünyasını dəyişmiş vətəndaşların ümumi sayı 195 nəfər, AİDS mərhələsinə keçənlərin sayı isə 294 nəfər təşkil edib.
İbişov bildirib ki, HİV-ə yoluxma faktı ilə bağlı qan nümunələrinin təsdiq olunmasından ötrü analizlər Respublika QİÇS-lə Mübarizə Mərkəzinə göndərilib.
BMT-nin HİV/AİDS üzrə Birləşmiş Proqramının (UNAİDS) və Ümumdünya Səhiyyə Təşkilatının (ÜST) məlumatına görə, təkcə 2007-ci il ərzində dünyada 2,5 milyon insan HİV-ə yoluxmuşdur və hal-hazırda dünyada HİV/AİDS-lə yaşayan insanların sayı 33,2 milyon təşkil edir. HİV/AİDS-li xəstələrin ömrünü uzadan antiretrovirus terapiyasının tətbiqi nəticəsində AİDS-dən vəfat edən insanların sayı son iki il ərzində azalıb.
Lənkəran paytaxt Bakıdan 270 kilometr cənubda yerləşir.
