Azərbaycan, Bakı, 04 fevral / Trend , müxbir K.Zərbalıyeva/ "Azadlıq" qəzetinin həbsdə olan əməkdaşı yenidən aclığa başlayıb.
Mirzə Sakitin həyat yoldaşı Rəna Zahidova bildirib ki, Sakit Ədliyyə Nazirliyinin Müalicə Müəssisəsinə köçürülməməsinə etiraz əlaməti olaraq fevralın 3-dən aclığa başlayıb.
Sakit yanvarın 26-da Müalicə Müəssisəsinə köçürülməsi tələbi ilə aclığa başlamışdı. Onun Müalicə Müəssisəsinə köçürülməsinə razılıq veriləndən sonra yanvarın 28-də aksiyanı dayandırmışdı.
Ədliyyə Nazirliyi Penitensiar Xidmətinin İctimaiyyətlə Əlaqələr Şöbəsindən bildirilib ki, Sakit Ədliyyə Nazirliyinin Səhiyyə Baş İdarəsinin həkimləri tərəfindən müayinə olunub və onun Müalicə Müəssisəsinə köçürülməsi məsləhət görülməyib.
Zahidova Sakitin vəziyyətinin ağır olduğunu,ayaqlarının tutulduğunu bildirib.
Ədliyyə Nazirliyi Penitensiar Xidmətinin İctimaiyyətlə Əlaqələr Şöbəsindən bazar ertəsi Trend ə bildirilib ki, Sakit fevralın 3-dən aclığa başlaması barədə cəza çəkdiyi müəssisənin rəhbərliyinə ərizə ilə müraciət edib.
İdarədən bildirilib ki, həkimlər Sakitin müəssisənin sanitar tibbi hissəsində müalicəsini mümkün sayıb. Sakit narkotiklərin satışı, saxlanması,qanunsuz dövriyyəsində təqsirli bilinərək 3 il müddətinə azadlıqdan məhrum edilib.
Azərbaycanda peşə fəaliyyəti ilə bağlı 3 jurnalist həbsdədir. Onlardan ikisi məhkəmənin hökmü ilə məhkum olunub, birinin isə məhkəmıə prosesi davam etdirilir.