Azərbaycan, Bakı, 20 fevral / Trend , müxbir K.Zərbalıyeva/ Azərbaycan Avropa Məhkəməsinin hakimi vəzifəsinə namizədlərini müəyyənləşdirib.
Məhkəmə-Hüquq Şurasından Trend ə bildirilib ki, Xanlar Hacıyev, Rövşən İsmayılov və Səadət Novruzova İnasan Haqları üzrə Avropa Məhkəməsinə namizəd kimi təklif olunublar.
Məhkəmə-Hüquq Şurasın?n yeni namizədlərin müəyyənləşdirilməsi üçün elan etdiyi müsabiqə fevralın 17-də başa çatıb. Məlumata görə, on nəfər hakimliyə namizəd irəli sürülüb.
Məlumata görə, Novruzova BDU-da "Beynəlxalq hüquq", İsmayılov isə "Konstitusiya hüququ"ndan dərs deyir. Novruzova həm də Prezidentin İcra Aparatının əməkdaşıdır.
Azərbaycanın Avropa Məhkəməsindəki hakimi Xanlar Hacıyev, Əzizbəyov rayon məhkəməsinin hakimi Rəşad Həsənov və Nəsimi rayon məhkəməsinin hakimi Aygün Abdullayevanın daxil olduğu ikinci siyahı Avropa Şurası Parlament Assambleyasının (AŞPA) İnsan hüquqları üzrə Avropa Məhkəməsinə hakimlərin seçilməsi üzrə Alt Komitəsinin dekabrın 17-də Parisdə keçirilən iclasında qəbul edilməyib. Alt Komitə siyahının daha da təkmilləşdirilmək üçün Azərbaycana geri qaytarılması barədə qərar qəbul edib. Qərarda qeyd olunub ki, Azərbaycanın təqdim etdiyi namizədlər AŞPA-nın tələblərinə və standartlarına cavab vermir.
Qaydalara əsasən, AŞPA-nın deputatlarının real seçim imkanı olması üçün Avropa Məhkəməsinin hakimi vəzifəsinə eyni təcrübə, bacarıq və biliyə malik şəxslərin namizədliyi irəli sürülməlidir.
Azərbaycandan namizədlərin siyah?s? birinci dəfə AŞPA-nın 2007-ci il oktyabr sessiyasında analoji səbəblərə görə geri qaytarılıb.
Azərbaycanın AŞPA-dakı nümayəndə heyətinin rəhbəri Səməd Seyidov Azərbaycanı Avropa Məhkəməsində təmsil edəcək hakimin seçilməsi məsələsinin bu ilin martınadək həll olunacağını bildirib.
Ali Məhkəmənin sədri Ramiz Rzayev bazar ertəsi jurnalistlərə açıqlamasında Ali Məhkəmədə Azərbaycanı Avropa Məhkəməsində təmsil edəcək hakimin olmadığını bildirmişdi.
Ekspertlər də Azərbaycanı Avropa Məhkəməsində təmsil edəcək hakimlərin seçimində yaranan əsas problemin hakimlərin xarici dil bilməməsi ilə bağlı olduğunu deyir.
Azərbaycanın Avropa Məhkəməsindəki səlahiyyətli nümayəndəsi Çingiz Əsgərov da bu sahədə yaranan problemin əsas səbəbinin xarici dili bilən hüquqşünasların azlığı ilə əlaqələndirib.
Onun fikrincə, xarici dili bilməməsi Azərbaycan hakimlərinin peşəkarlıq səviyyəsinin göstəricisi ola bilməz.
