Azərbaycan, Bakı, 19 mart / Trend , müxbir K.Zərbalıyeva/ Korrupsiya cinayətlərində ittiham olunan sabiq iqdisadi inkişaf naziri və onula birgə həbs olunmuş şəxslərin apellyasiya şikayəti üzrə hazırlıq iclası davam edir.
Sabiq iqtisadi inkişaf naziri Fərhad Əliyev və onun qardaşı, "Azpetrol" şirkətinin keçmiş prezidenti Rafiq Əliyev 2005-ci ilin oktyabrında həbs edilib. Həmin vaxt onların hər ikisi dövlət çevrilişi və kütləvi iğtişaşlar hazırlamaqda ittiham edilib.
Günün birinci yarısında F.Əliyevin vəkili Elton Quliyev vəsatətlə çıxış edərək məhkəmə istintaqının təzələnməsi ilə məhkəmə baxışının yenidən aparılmasını xahiş edib. Vəkil bildirib ki, hüquqlarını müdafiə etdiyi şəxslə bağlı çoxsaylı vəsatətlər birinci instansiya məhkəməsində təmin olunmayıb və təqdim olunmuş sübutlar araşdırılmayıb.
Sabiq iqtisadi inkişaf naziri birinci instansiya məhkəməsinin işinə qərəzli baxdığını, məhkəmə ərəfəsində ona cinayət işinin materialları ilə tanış olmaq üçün vaxt verilmədiyini deyib.
Sonradan F.Əliyevə Cinayət Məcəlləsinin 179.3.1-ci (mütəşəkkil dəstə tərəfindən mənimsəmə və rüşvət alma), 179.3.2-ci (külli miqdarda mənimsəmə və israfetmə), 192.2.1-ci (külli miqdarda gəlir əldə etməklə qanunsuz sahibkarlıq), 192.2.2-ci ( mütəşəkkil dəstə tərəfindən qanunsuz sahibkarlıq), 206.4-cü (qaçaqmalçılıq) ,213-cü (vergi ödəməkdən yayınma), 308.2-ci (vəzifə səlahiyyətlərindən sui-istifadə), 311.3.1-ci (qabaqcadan əlbir olan bir qrup şəxs və ya mütəşəkkil dəstə tərəfindən rüşvət alma), 313.3.2-ci (rüşvət alma təkrar törədildikdə), 313.3.3-ci (külli miqdarda rüşvət alma), 313-cü (vəzifə saxtakarlığı), qardaşı R.Əliyevə isə 213 (vergi ödəməkdən yayınma) və 206.4-cü (qaçaqmalçılıq) maddələri ilə ittiham elan edilib.
Fərhad və Rafiq Əliyevlərə qarşı dövlət çevrilişi və kütləvi iğtişaşlar hazırlanması ilə bağlı elan olunan ittihamlar isə ayrıca icraata götürülüb.
Ağır Cinayətlərə Dair İşlər üzrə Məhkəmənin hökmü ilə əmlakı müsadirə olunmaqla sabiq nazir 10, qardaşı R.Əliyev isə 9 il azadlıqdan məhrum edilib. Həmçinin məhkəmə Əliyev qardaşlarının həbsdən azad olunduqdan sonra 5 il müddətinə dövlət vəzifəsi tutmalarını qadağan edən qərar çıxarıb.