Jurnalistlərin aclıq aksiyası ilə bağlı beynəlxalq təşkilatlara müraciət qəbul olunub
Azərbaycan, Bakı, 01 aprel / Trend , müxbir S.İlhamqızı/ Azərbaycanın siyasi partiyalarının, qeyri-hökumət təşkilatlarının rəhbərləri, hüquq müdafiəçiləri, bir qrup jurnalisti adından beynəlxalq təşkilatlara müraciət qəbul olunub. Trend un məlumatına görə, Söz Azadlığını Müdafiə Komitəsinin çərşənbə axşamı keçirilən genişləndirilmiş toplantısında bu müraciət hazırlanıb.
12 saylı Cəzaçəkmə Müəssisəsində saxlanılan "Gündəlik Azərbaycan" və "Realnıy Azərbaycan"qəzetlərinin baş redaktoru Eynulla Fətullayev martın 26-dan həbsdə aclığa başlayıb. Baş redaktor işinə ədalətli və qərəzsiz baxılmasını, həbsdə olan həmkarlarının azadlığa çıxmasını tələb edir, Avropa Şurası və ATƏT-in siyasi məhbus məsələsində konkret müdafiə mexanizmləri ortaya qoymasını istəyir. Fətullayevə dəstək məqsədilə, "Yeni Müsavat" qəzetinin redaksiyasında "Gündəlik Azərbaycan" qəzetinin şef-redaktoru Şahvələd Çobanoğlu, "Yeni Müsavat" qəzetinin redaktoru Zahid Səfəroğlu və qəzetin əməkdaşı Elşən Balaxanlı, "Bizim yol" qəzetinin əməkdaşı Natiq Cavadlı, "Yeni Müsavat" qəzetinin əməkdaşı Zamin Hacı və başqaları açılıq aksiyası keçirirlər.
Müraciətdə Azərbaycanda öldürülmüş, fiziki təzyiqlərə, zorakılıqlara məruz qalmış jurnalistlər barədə məlumat verilir, jurnalistlərə qarşı cinayətlərin üstünün açılmadığı bildirilir. Söz Azadlığını Müdafiə Komitəsi Azərbaycanın söz, mətbuat azadlığı ilə bağlı Avropa Şurası qarşısında götürdüyü öhdəlikləri yerinə yetirməsinə nəzarətin gücləndirilməsi xahiş edir.
Jurnalistlərin aclıq aksiyasına siyasi partiyaların nümayəndələrinin də qoşulması qərara alınıb. Artıq millət vəkili Pənah Hüseyn, Azərbaycan Liberal Partiyasının sədr əvəzi Əvəz Temirxan aclığa qoşulacalarını bildiriblər.
ADP sədri Sərdar Cəlaloğlu Trend a açıqlamasında bildirib ki, jurnalistlərin etiraz aksiyasına xaricdə yaşayan azərbaycanlıların da dəstək verməsi, onların beynəlxalq təşkilatlara müraciətlər etməsi istiqamətində iş aparılmasına qərar verilib.
Müəlliflə əlaqə saxlamaq üçün elektron ünvan - [email protected]
