Azərbaycan, Bakı, 04 aprel/ Trend , müxbir K.Ramazanova/Fransa, Böyük Britaniya, Almaniya, İtaliya, Yunanıstanın Azərbaycandakı səfirliklərinin nümayəndələri cümə günü aclıq aksiyası keçirən Azərbaycan jurnalistlərinə baş çəkiblər. Səfirliklərin nümayəndələri Azərbaycanda KİV-in vəziyyəti ilə bağlı narahatlıq bildiriblər və öz hökumətlərini aclıq aksiyası haqqında məlumatlandıracaqlarını qeyd ediblər.
Hazırda Azərbaycanda üç jurnalist həbsdədir. "Gündəlik Azərbaycan" və "Realnıy Azerbaydjan" qəzetlərinin12saylı islah müəssisəsində saxlanılan redaktoru Eynulla Fətullayev martın 26-dan aclıq aksiyasına başlayıb. Baş redaktor işinə ədalətli və qərəzsiz baxılmasını, həbs edilmiş həmkarlarının azad edilməsini, Avropa Şurası və ATƏT tərəfindən siyasi məhbuslar məsələsində konkret müdafiə mexanizminin təqdim edilməsini tələb edir.
Fətullayev ötən il həbs edilib və ağır cinayətlərdə günahkar sayılıb. O, məhkəmənin qərarı ilə səkkiz il yarım müddətinə azadlıqdan məhrum edilib.
Fətullayevin dəstəklənməsi məqsədilə, jurnalistlər, müxalifətdən olan deputatlar və siyasətçilər aksiyaya qoşulublar.
Müəlliflə əlaqə saxlamaq üçün elektron ünvan: [email protected]
