Türkiyə, Ankara, 14 aprel / Trend , müxbir Y.Tahiroğlu/ Azərbaycan və Türkiyə Ali Məhkəmələri arasında sıx əməkdaşlıq əlaqələri var. Bunu bazar ertəsi Trend a, Türkiyədə səfərdə olan Ali Məhkəmənin sədri Ramiz Rzayev deyib.
Ali Məhkəmənin sədri bildirib ki, ötən il Bakıda Türkiyə ilə Azərbaycanın Ali Məhkəmələri arasında qarşılıqlı əməkdaşlıq haqqında memorandum imzalanıb.
Rzayev memarandum çərçivəsində Türkiyənin Ali Məhkəməsi sədrinin dəvəti ilə bu ölkədə səfərdədir.
Ali Məhkəmə sədri deyib ki, səfərdə məqsəd iki ölkənin məhkəmə sistemləri arasında əməkdaşlığın daha da genişləndirilməsidir. Bu çərçivədə hakimlərin birgə treninqləri və konfransların təşkil edilməsi nəzərdə tutulur.
Rzayev bu gün Türkiyənin Ali Məhkəməsinin sədri Hasan Gerçeker, ədliyyə naziri Mehmet Ali Şahin və Konstitusiya Məhkəməsinin sədri Haşim Kılıçla görüşüb.
Danışıqlarda iki ölkənin məhkəmə orqanları arasında əməkdaşlıq, təcrübə mübadiləsi, hüquq sistemlərinin yaxınlaşdırılması məsələləri müzakirə edilib.
Rzayevin səfər proqramında prezident Abdulla Gül və Türkiyə Böyük Millət Məclisinin sədri Köksal Toptan və Baş prokurur Abdurahman Yalçınkaya ilə görüşlər də nəzərdə tutulub.
Məqalənin müəllifi ilə [email protected] ünvanı ilə əlaqə saxlaya bilərsiniz