Azərbaycan, Bakı, 21 aprel / Trend , müxbir C.Babayeva/ Azərbaycanda QHT-lərə yardım məqsədi ilə dövlət 1,5 milyon manat ayıracaq. Bu barədə bazar ertəsi Trend -a Şuranın üzvü, "İrəli" Ümumrespublika Gənclər Hərəkatının həmtəsisçisi Ceyhun Osmanlı məlumat verib.
Azərbaycan prezidenti aprelin 16-da Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurası üzvlərinin təyin edilməsi haqqında Sərəncam imzalayıb.
Osmanlının sözlərinə görə, yaxın günlərdə bütün QHT-lərin iştirakı ilə Şuranın təqdimat forumu keçiriləcək. QHT-lərin Şuranın fəaliyyəti ilə bağlı irəli sürəcəkləri təkliflər müzakirə olunduqdan sonra ilkin qrant raund elan olunacaq. Bu raund çərçivəsində səkkiz istiqamət əsasında qeydiyyatdan keçmiş QHT-lərə qrantlar paylanacaq.
Şura üzvünün bildirdiyinə görə, qrantlardan əlavə, eyni zamanda ehtiyacı olan QHT-lərə texniki dəstək, texniki ləvazimatların alınması da nəzərdə tutulub, ehtiyacı olan QHT-lərə ekspert dəstəyi kimi xidmətlər də göstəriləcək.
Osmanlının sözlərinə görə, Dağlıq Qarabağla bağl fəaliyyət Şuranın xüsusi istiqamətlərindən biri olacaq.
Şuraya üzv olan nümayəndələrin biri də Qaçqın və Məcburi Köçkün Gənclər Təşkilatıdır. Qarabağla bağlı təbliğat, beynəlxalq və yerli tədbirlər keçirən, xüsusi layihə təqdim edən QHT-lər Şura tərəfindən maliyyələşdiriləcək.
