Azərbaycan, Bakı,07 may / Trend , müxbir K. Zərbalıyeva/ "Müxalifət" qəzetinin əməkdaşının Bakı Dövlət Universitetinin rektoruna qarşı iddiası təmin olunmayıb.
Qəzetin yazarı Yaşar Ağazadə iddia edir ki, rektor Abel Məhərrəmov onunla bağlı Maliyyə naziri Samir Şərifova yazdığı məktubda təhqirə yol verib.
Belə ki, Ağazadə Maliyyə Nazirliyinə BDU-da keçirdikləri yoxlamaların nəticələri ilə bağlı rəsmi informasiya almaq üçün sorğu verib.
Maliyyə naziri Samir Şərifov bu sorğu ilə bağlı rektora şifahi müraciət edərək, ona bu haqda bildirib. Məhərrəmov Şərifova rəsmi məktub göndərərək, 2003-cü ildə yazılan məqaləyə görə, Ağazadəyə yoxlamalarla bağlı informasiya verməyin məqsədəuyğun olmadığını deyib.
Həmin məktubda rektor Ağazadənin ünvanına "iyrənc metodlara əl atan, şantaj, böhtan dolu yazılar yazan jurnalist" kimi ifadələr işlədib.
Qəzetin əməkdaşı Yaşar Ağazadə çərşənbə günü Trend a bildirib ki, prosesdə rektorun yazdığı məktubda təhqir elementinin olub-olmadığınl müəyyənləşdirmək üçün ekspertin yazılı rəyi açıqlanıb. Rəydə rektorun məktubunda heç bir təhqir elementinin olmadığı bildirilir.
Ağazadə məktubda böhtançı kimi qələmə verildiyinə görə, məhkəmədən Abel Məhərrəmovun1000 manat məbləğində cərimə olunaraq, sərimənin Azərbaycan Silahlı Qüvvələrinə Yardım Fonduna köçürülməsini və tələb etdiyi informasiyanın ona verilməsini təmin etməyi xahiş edir.
Ağazadə məhkəmənin qətnaməsindən apellyasiya şikayəti verəcək.
Müəlliflə əlaqə saxlamaq üçün elektron ünvan - [email protected]
