Azərbaycan, Bakı, 14 may /müx. TrendLife Günel Əhmədova
Rüstəm Zeynallının rəhbərlik etdiyi "Şeron" qrupu yeni mahnı yazdırıb. Regiona həsr olunan mahnı "Ağsu" adlanır. Musiqisi Rüstəm Zeynallıya, sözləri Sərvər Şahbəyliyə aid olan bu mahnıya Ağsuda klip çəkiləcək. Çəkilişlərə isə mayda başlanılacaq.
Belə bir mövzuya müraciət etməsinin səbəbini Rüstəm TrendLife-a "bizim bir çox rayonlarımız haqqında mahnılar var, amma Ağsu haqqında yox idi. Mahnının sözlərini yazan Sərvər Şahbəyli də Ağsudandır. Onunla birgə belə bir mahnı ərsəyə gətirdik. Qoy bu mahnı da bizdən yadigar qalsın" deməsi ilə izah etdi.
Son aylar fəaliyyətinin bir qolunu mahnı bəstələməyə yönəldən R.Zeynallı qrupun digər üzvlərinin də belə bir istedadının üzə çıxdığını bildirdi. Qeyd edək ki, onların bəstəsi artıq bir neçə tanınmış müğənnilərin ifasında səslənib.
Yay aylarında bolluca səfərləri olan "Şeron" layihələrindən də söhbət açdı. Qrupların hər hansı bir müğənni ilə duet ifa etməsi bu gün dəb halını alsa da, "Şeron" qrupu da bundan geri qalmaq istəmədi. Bir neçə müğənni ilə layihə şəklində duet hazırlayacaqlarını deyən Rüstəm ad çəkməsə də, sənətçilərdən birinin qocaman sənətkar olduğunu söylədi.