Azərbaycan, Bakı, 02 iyun/ Trend , müxbir E.Babayev/ Azərbaycan Mətbuat Şurası jurnalistlərin fəxri adlarla təltif olunması üçün müvafiq işlərə başlayıb. " 22 iyul-Milli Mətbuat Günü ərəfəsində Azərbaycan jurnalistlərinə fəxri adların verilməsi üçün təkliflər zərfi hazırlanır"- bazar ertəsi Trend -a Şuranın sədri Əflatun Amaşov bildirib.
Trend -un arayışı: İki il bundan öncə Azərbaycan Milli Mətbuatının yaranmasının 130 illik yubileyi ərəfəsində prezident İlham Əliyevin sərəncamı ilə 140 jurnalistə fəxri adlar verilib. Jurnalistlərin bir qrupu əməkdar jurnalist adı, bir qrupuna isə "Tərəqqi" medalı ilə təltif edilib.
Amaşov bildirib ki, jurnalistlərə yenidən fəxri adların verilməsinə ehtiyac var. Keçən dəfə təqribən 1500 jurnalist fəxri ad üçün muraciət etmişdi, amma onlardan bir qisminə ad vermək mümkün olmuşdu. "İndi bizə belə müraciətlər yenidən daxil olmaqdadır və hazrıda 10-larla belə müraciət var. Mətbuat Şurası həmin müraciətləri araşdırır"- deyən Amaşov əlavə edib ki, Azərbaycan jurnalistlərinin iyunun 20-də keçirilməsi gözlənilən qurultayında bu məsələnin də müzakirə ediləcəyi və fəxri adlarla bağlı prezidentə müraciət olunacağı gözlənilir.
Məqalə müəllifi ilə əlaqə ünvanı: [email protected]
