Azərbaycan, Bakı, 12 iyun / Trend , müxbir C.Babayeva/ Azərbaycan Prezidenti yanında Qeyri-Hökumət Təşkilatlarına (QHT) Dövlət Dəstəyi Şurası QHT layihələrinin maliyyələşdirilməsi ilə bağlı 15 istiqamət üzrə müsabiqə elan edib. Bu barədə cümə axşamı Bakıda keçirdiyi mətbuat konfransında Şuranın sədri Azay Quliyev məlumat verib.
Əsas istiqamətlər - insan haqları, demokratik proseslərin inkişafı və vətəndaşların seçki fəallığının artırılması, söz, fikir və ifadə azadlığının genişlənməsi; QHT-lərin inkişafı, maarifçilik və ictimaiyyətlə əlaqələrin gücləndirilməsi; qaçqın və məcburi köçkünlərin, əsir və girov götürülmüş şəxslərin hüquqlarının müdafiə edilməsi, Ermənistan-Azərbaycan Dağlıq Qarabağ münaqişəsi ilə bağlı Azərbaycanın mövqeyinin xarici ölkələrdə və beynəlxalq təşkilatlarda təbliğ edilməsi; ailə, qadın, uşaq və gənclərin problemlərinin həllinə dəstək; qaçqın və məcburi köçkünlərin, əlil, veteran və şəhid ailələrinin problemlərinin həllinə kömək; Azərbaycanın dünya birliyinə inteqrasiyasının təşviqi və azərbaycançılığın təbliği; Azərbaycanın milli etnik müxtəlifliyini və milli azlıqların mədəni irsinin qorunması; səhiyyənin inkişafı, ətraf mühitin mühafizəsi və təbii sərvətlərdən səmərəli istifadə edilməsi; gənclərin vətənpərvərlik ruhunun gücləndirilməsi, elm, təhsil və mədəniyyətin inkişafı; terrorizmə, narkomaniyaya, korrupsiyaya və insan alverinə qarşı mübarizə; regionlarda sosial-iqtisadi inkişafa, vətəndaş cəmiyyəti təsisatlarının möhkəmlənməsinə və institusional inkişafına dəstək; sahibkarlığın inkişafı, sosial tərəfdaşlıq mexanizmlərinin təkmilləşdirilməsi və sosial sərmayə proqramlarının effektivliyinin monitorinqi.
Bu istiqamətlər üzrə ümumi fond hər biri üçün 90 min manat təşkil edir.
Bundan başqa, beynəlxalq təşkilatlarla və xarici ölkələrdə fəaliyyət göstərən qeyri-hökumət qurumları ilə əməkdaşlığın genişləndirilməsi (ümumi fond 70 min manat); QHT-lərin fəaliyyətini tənzimləyən qanunvericilik bazasının və dövlət orqanları ilə QHT-lərin münasibətlərinin dərinləşməsinə yönəlmiş normativ hüquqi aktların təkmilləşdirilməsi (ümumi fond 30 min manat).
Dövlət Dəstəyi Şurasının builki büdcəsi 1,5 milyon manat təşkil edir və bu məbləğ əvəzi ödənilmədən dövlət tərəfindən ayrılmış maliyyə vəsaitidir.
Musabiqədə iştirak etmək üçün QHT-lərin dövlət qeydiyyatı və bank hesabı olmalıdır, hər QHT yalnız bir layihə ilə çıxış edə bilər. Hər layihə üçün maksimum məbləğ 20 min manat müəyyən olunub. Müsabiqənin nəticələri iyulun 30-dan sonra elan olunacaq.
Ərizələr iyunun 12-dən iyulun 2-dək qəbul olunur.
Şura sədrinin sözlərinə görə, müsabiqədə qalib gələn QHT-yə ayrılacaq maliyə vəsaitinin monitorinqi aparılacaq. Şuranın Əsasnaməsinə əsasən, QHT vəsaiti təyinatı üzrə xərcləməzsə, Şura həmin QHT-ni iki il müddətinə layihələrindən məhrum edəcək", - deyə Quliyev qeyd edib. Onun bildirdiyinə görə, Dövlət Dəstəyi Şurasının üzvlərinə müsabiqədə iştirakla bağlı məhdudiyyət qoyulmayacaq.
