Azərbaycan, Bakı, 23 iyun/ Trend , müxbir C.Babayeva/ Azərbaycanın Nazirlər Kabineti Təhsil Nazirliyi nəzdində təsərrüfathesablı Təhsil Sisteminin İnformasiyalaşdırılması İdarəsinin yaradılması haqqında qərar imzalayıb. Qərar təhsil sisteminin bütün pillələrini əhatə edən vahid təhsil informasiya mühitinin formalaşdırılması, informasiya və kommunikasiya texnologiyalarının tətbiqi, bu sahəyə dövlət büdcəsindən və digər maliyyə mənbələrindən ayrılmış vəsaitlərin idarə edilməsi və səmərəli istifadəsi, təsdiq edilmiş proqramın yüksək keyfiyyətlə həyata keçirilməsi məqsədi ilə qəbul edilib.
Trend - un arayışı: Azərbaycan prezidenti iyunun 10-da "2008-2012-ci illərdə Azərbaycan Respublikasında təhsil sisteminin informasiyalaşdırılması üzrə Dövlət Proqramı"nı təsdiq edib.
Qərarla informasiya-kommunikasiya texnologiyalarının tətbiqi sahəsində dövlət investisiya xərcləri və xarici investisiyalar hesabına nəzərdə tutulmuş vəsaitlər üzrə sifarişçi funksiyasının Təhsil Nazirliyi Təhsil Sisteminin İnformasiyalaşdırılması İdarəsi vasitəsilə həyata keçirilməsi müəyyən edilib.
Dövlət Əmlakının İdarə Edilməsi üzrə Dövlət Komitəsi ilə birlikdə Təhsil Sisteminin İnformasiyalaşdırılması İdarəsinin yerləşdirilməsi məsələsini həll etmək, İdarənin strukturunu və xərclər smetasını hər il Maliyyə Nazirliyi ilə razılaşdırılmaqla təsdiq etmək Təhsil Nazirliyinə tapşırılıb.
Nazirlər Kabinetinin bu qərarı imzalandığı gündən - iyunun 19-dan etibarən qüvvədədir.
Məqalə müəllifi ilə əlaqə ünvanı: [email protected]
