Azərbaycan, Bakı, 04 iyul/ Trend , müxbir E.Babayev/ ABŞ-da "US Azeri's Network" şəbəkəsinin təqdimat mərasimi oktyabrda keçiriləcək. "Bu məqsədlə keçiriləcək konfransa Azərbaycandan çox böyük nümayəndə heyəti qatılacaq. O cümlədən, ABŞ-ın dövlət katibi Kondaliza Rays, konqresmenlər, senatorlar tədbirə dəvət olunacaq", cümə günü Trend -a Xaricdə Yaşayan Azərbaycanlılarla İş üzrə Dövlət Komitəsi sədrinin birinci müavini Valeh Hacıyev bildirib.
Trend -un arayışı: "US Azeri's Network" şəbəkəsi ötən il yaradılıb. Şəbəkəyə Adil Bagirov rəhbərlik edir.
Hacıyev bildirib ki, "US Azeri's Network" böyük bir şəbəkədir və Amerikanın bütün ərazisini əhatə edir. Eyni zamanda, ABŞ-dakı bütün Azərbaycan əsilli vətəndaşları, tələbələri, diaspor təşkilatlarını, qrin kart sahiblərini, region üzrə ekspertləri ölkəmizlə bağlı proseslərlə tanış edir. "Şəbəkə vasitəsilə seçmək, seçilmək hüququna malik olan azərbaycanlılar öz konqresmenləri, senatorları, yaşadıqları şəhərin rəsmiləri ilə intensiv şəkildə əlaqə saxlaya bilirlər, onlara müəyyən məsələlərlə bağlı müraciət ünvanlaya bilirlər. Qeyd edim ki, bu şəbəkə vasitəsilə ABŞ-ın rəsmi dairələrinə 20 mindən artıq məktub göndərilib. İstər Xocalı faciəsi, istərsə də Dağlıq Qarabağ münaqişəsinin detalları ilə bağlı məktublar ünvanlanıb. Belə bir şəbəkənin olması Azərbaycan diasporunun həyatında çox önəmli bir hadisədir", - deyə o əlavə edib.
Məqalə müəllifi ilə əlaqə ünvanı: [email protected]