Azərbaycan, Bakı, 17 iyul/ Trend , müxbir R.Novruzov/ ATƏT Azərbaycanın "Azadlıq" qəzetinin jurnalistinə hücum haqqında iş üzrə məhkəmə prosesini pisləyib.
ATƏT-in söz azadlığı və media üzrə nümayəndəsi Mikloş Haraşti "Azadlıq" qəzetinin jurnalisti Aqil Xəlilə hücum etməkdə günahlandırılan Sergey Strekalin üzərində məhkəməni "düşmən kampaniya" adlandırıb.
Bazar ertəsi Bakının Nəsimi rayon məhkəməsi Strekalinin 1 il 5 ay müddətinə azadlıqdan məhrum edilməsi barədə qərar çıxarıb.. "Azadlıq" qəzetinin müxbiri Xəlil bu il martın 13-də Ayna Sultanova küçəsi 523-ci məhəllədə yerləşən binalardan birinin yaxınlığında naməlum şəxslər tərəfindən bıçaqlanıb. Baş Prokurorluğun yaydığı məlumatda isə, jurnalistin qeyri-ənənəvi cinsi orientasiyaya malik şəxslər tərəfindən bıçaqlandığı bəyan edilib.
Belə ki, Xəlilin əvvəllər tanıdığı və onunla intim əlaqədə olmuş Strekalin tərəfindən bıçaqlandığı istintaqla sübuta yetirilib.
Strekalin, Cinayət Məcəlləsinin qəsdən sağlamlığa az ağır xəsarət yetirmə (127.1) və satış məqsədi olmadan qanunsuz olaraq narkotik vasitələri əldə etmə və saxlama (234.1) maddələri ilə təqsirli bilinərək, həbs olunub.
ATƏT-in saytında yerləşdirilən bəyanatında Haraşti Strekalinə qarşı ittihamları "uydurulmuş" adlandırır.
ATƏT nümayəndəsi həbsdə olan jurnalistlərin azad edilməsi çağırışı ilə Azərbaycan hökumətinə müraciət edib. Azərbaycanda üç jurnalist həbsdədir - "Gündəlik Azərbaycan" və "Realnıy Azerbaydjan" qəzetlərinin Baş redaktoru Eynulla Fətullayev, "Azadlıq" qəzetinin Baş redaktoru Qənimət Zahid və onun qardaşı, qəzetin əməkdaşı Mirzə Sakit.
Müəlliflə əlaqə saxlamaq üçün elektron ünvan - [email protected]