...

Azərbaycan əhalisinin dövlət reyestrinin ehtiyat surəti yaradılır

Cəmiyyət Materials 6 Oktyabr 2008 11:30 (UTC +04:00)

Trend-i buradan izləyin

Azərbaycan, Bakı, 06 oktyabr / , müxbir K.Zərbalıyeva/ Azərbaycan Respublikası Əhalisinin Dövlət Reyestrinin (ƏDR) informasiya bazasının etibarlı qorunması məqsədilə reyestrin informasiya ehtiyatının ehtiyat surəti yaradılacaq.

Ədliyyə Nazirliyi yanında Əhalinin Dövlət Reyestri Xidmətinin rəis müavini Mehdi Nəcəfov bazar ertəsi Trend -a müsahibəsində bildirib ki, əhali barəsində vahid məlumatların təbii, texniki fəlakətlərdən, hərbi münaqişə və digər qəzalardan mühafizəsi məqsədilə yaradılacaq sistemin əsas mərkəzi Bakıda, ehtiyat surəti isə paytaxtdan kənarda yerləşəcək.

Həmin yerin seçilməsi üçün müvafiq işlərin görüldüyünü deyən rəis müavini yer seçilərkən ərazinin dayanaqlı elektrik və digər komunikasiya vasitələri ilə təmin olunmasına diqqət yetiriləcəyini də bildirib.

BMT-nin İnkişaf Proqramı və Azərbaycan Hökuməti arasında imzalanmış sazişlə Əhalinin Dövlət Reyestrinin formalaşması və inkişafı layihəsi icra olunur. 2006-cı ildən başlanmış layihənin birinci mərhələsi artıq yekunlaşıb. Bu ilin aprelindən başlayan ikinci mərhələdə ƏDR-nin informasiya ehtiyatının ehtiyat surətinin yaradılması işləri də nəzərdə tutulub.

Gələn ilin ortalarınadək ikinci mərhələnin yekunlaşması nəzərdə tutulub.

Nəcəfov deyib ki, BMT-nin İnkişaf Proqramının Azərbaycan üzrə nümayəndəliyinin rəhbərliyi layihə çərçivəsində görülmüş işlərlə tanış olub və onları yüksək qiymətləndirərək üçüncü mərhələnin həyata keçirilməsi məsələsinində real olduğunu vurğulayıb.

Əhalinin Dövlət Reyestrinin informasiya bazasını insanların yaşadığı və olduğu yer üzrə Daxili İşlər Nazirliyinin Avtomadlaşdırılmış Məlumat Axtarış Sistemi (AMAS) və hazırda formalaşan Vətəndaşlıq Vəziyyəti Aktlarının avtomatlaşdırılmış qeydiyyat informasiya sisteminin məlumatları təmin edəcək.

Nəcəfovun sözlərinə görə, əhalinin reyestrinin yaradılması respublikada əhali ilə bağlı vacib sosioloji və statistik təhlillərin aparılmasına imkan verəcək.

Rəis müavini deyib ki, Əhalinin Dövlət Reyestrinin məlumat bazasının formalaşdırılması üçün ötən əsrin 20-30-cu illərindən sonra qəbul edilmiş vətəndaşlıq vəziyyəti aktlarının kağız arxivinin elektron varianta keçirilməsi işləri davam etdirilir.

Məqalə müəllifi ilə əlaqə ünvanı - [email protected]

Xəbər lenti

Xəbər lenti