Azərbaycan, Bakı, 20 oktyabr / Trend , müxbir K.Zərbalıyeva/ Azərbaycanda vəkilliyə qəbul üçün elan olunmuş sənəd qəbulu gələn ay başa çatacaq.
Vəkillər Kollegiyasından bazar ertəsi Trend -a verilən məlumata görə, vəkilliyə qəbul üçün sənəd qəbulu iyulun 15-dən başlasa da, indiyədək 142 nəfər sənəd verib.
Məlumata görə, sənəd qəbulu noyabrın 15-də başa çatacaq və namizədlərlə dekabrda test imtahanlarının keçirilməsi gözlənilir.
Müsabiqə 2 mərhələdən ibarətdir. Birinci mərhələdə namizədlərlə test imtahanı keçirilir və onlar hüququn müxtəlif sahələrinə, məntiqə aid sualları cavablandırırlar. Bu mərhələdə 50 və daha çox bal toplamış namizəd müsahibə mərhələsində iştirak etmək imkanı qazanır.
Vəkillər Kollegiyasına üzvülük üçün sonuncu müsabiqə ötən il keçirilib və müvəffəqiyyət qazanmış 241 namizəd vəkilliyə qəbul olunub.
Azərbaycan vəkillərin sayına görə, Avropa ölkələri sırasında sonuncu yerlərdə durur.
Bu müsabiqədən sonra Azərbaycanda vəkillərin sayı 800-ə çatdırılıb.
Müəlliflə əlaqə saxlamaq üçün elektron ünvan- [email protected]
