Azərbaycan, Bakı, 04 dekabr / Trend , müxbir K.Zərbalıyeva/ Azərbaycan parlamenti prezidentin səlahiyyət müddəti ilə bağlı Konstitusiyaya dəyişiklik edilməsi təklifini müzakirəyə çıxara bilər, -cümə axşamı Milli Məclis Aparatının rəhbəri Səfa Mirzəyev Trend - a deyib.
Trend - un arayışı: Azərbaycan Konstitusiyasının 101 - ci maddəsinin 5 - ci bəndinə əsasən, heç kəs iki dəfədən artıq təkrarən prezident seçilə bilməz. Prezidentin səlahiyyət müddəti beş ildir.
Azərbaycanın hakim Yeni Azərbaycan Partiyası (YAP) bir şəxsin iki dəfədən artıq ölkə prezidenti seçilməsini qadağan edən maddənin Konstitusiyadan çıxarılması üçün referendum keçirilməsini təklif edir.
YAP icra katibinin müavini, deputat Siyavuş Novruzov hesab edir ki, Konstitusiyada belə bir limitin olması demokratik prinsiplərə ziddir və xalqın seçim hüququnu məhdudlaşdırır.
Konstitusiya Məhkəməsinin sədri Fərhad Abdullayev bu məsələnin referenduma çıxarılmasını istisna etməyib.
Mirzəyev bildirib ki, prezidentin səlahiyyət müddəti ilə bağlı Konstitutsiyaya dəyişikliyin edilməsi barədə Milli Məclisə rəsmi sənəd daxil olmayıb.
"Bu, müxtəlif partiya funksionerləri tərəfindən irəli sürülmüş fikirdir. Məsələ referendum yolu ilə həll olunmalıdır və Milli Məclisin səlahiyyətinə aid deyil. Sözsüz ki, Milli Məclisə rəsmi təklif olarsa, buna baxılacaq,"- deyə Mirzəyev əlavə edib.
Məqalə müəllifi ilə əlaqə ünvanı:[email protected]