Azərbaycanlı zəvvarların Həcc ziyarətindən gətirdikləri dini kitablar ekspertizadan keçiriləcək
Azərbaycan, Bakı, 17 dekabr / Trend , müxbir C.Babayeva/ Azərbaycanlı zəvvarların Həcc ziyarətindən gətirdikləri dini kitablar Dini Qurumlarla İş üzrə Dövlət Komitəsi tərəfindən ekspertizadan keçiriləcək.
"Bu cür tədbirlər hər il həyata keçirilir. Zəvvarların gətirdikləri dini kitablar Dövlət Komitəsinə təqdim olunur və qurum həmin kitabların məzmununu araşdırdıqdan sonra, onların idxal olunub-olunmaması barədə qərar qəbul edir",- deyə Dini Qurumlarla iş üzrə Dövlət Komitəsinin Dinşünaslıq ekspertizası, ictimai məsələlər və analitik təhlil şöbəsinin müdiri Ceyhun Məmmədov çərşənbə günü Trend - a bildirib.
Trend - un arayışı: Dini Qurumlarla İş üzrə Dövlət Komitəsi (DQİDK) ötən il 750 adda dini ədəbiyyata baxıb və dini dözümsüzlüyü, ayrı-seçkiliyi təbliğ edən 140 adda kitabın ölkəyə idxalının və yayılmasının qarşısını alıb. DQİDK- da qadağan olunmuş dini ədəbiyyatların siyahısı var. İnsanlar arasında irqi, dini ayrı - seçkilik salan, dini ədavət yaradan kitabların nəşri, satışı qanunla qadağan olunur.
2008 - ci ildə Azərbaycana Həcc ziyarəti üçün 6000 nəfərlik kvota ayrılıb. Qafqaz Müsəlmanları İdarəsindən verilən məlumata görə, ayrılan yerlərin bir hissəsi boş qalıb. Azərbaycanlı zəvvaların bir hissəsi vətənə qayıdıb.
Məmmədovun sözlərinə görə, bəzi qurumlar və insanlar, xüsusilə Həcc dövründə, ölkəyə icazəsiz dini kitabların gətirilməsinə cəhd edirlər. "Dövlət Komitəsi Həcc dövründə mütəmadi olaraq belə hallarla rastlaşır", - deyə şöbə müdiri bildirib.
O, bu ilki zəvvarların gətirdikləri kitabların hələ Dövlət Komitəsinə təqdim olunmadığını bildirib.
Məqalə müəllifi ilə əlaqə saxlamaq üçün ünvan: [email protected]rend.az
