Azərbaycan, Bakı, 12 yanvar / Trend , müxbir K.Zərbalıyeva/ Azərbaycanın "Müxalifət" qəzetinin
jurnalisti Yaşar Ağazadənin daha bir şikayəti Avropa
İnsan Hüquqları Məhkəməsinə
göndərilib, -bazar ertəsi Trend -a Hüquq
Maarifçiliyi Cəmiyyətindən məlumat verilib.
Ərizəçi Strasburq Məhkəməsinə
ünvanladığı şikayətdə İnsan
hüquqlarının və əsas azadlıqların
müdafiəsi haqqında Avropa Konvensiyası ilə
təminat verilən ədalətli məhkəmə
araşdırması hüququna (6- cı maddə), informasiya
əldə etmək və yaymaq hüququna (10-cu maddə),
səmərəli hüquqi müdafiə vasitələri
hüququna (13-cü maddə) və ayrı - seçkiliyin
qadağan edilməsi hüququna (13 - cü maddə)
əsassız müdaxiləyə yol verildiyini iddia edir.
Ərizəçi 2006-cı il iyunun 27 -
də Azərbaycanın maliyyə naziri Samir Şərifova
informasiya sorğusu ilə müraciət edərək,
Maliyyə Nazirliyinin Bakı Dövlət Universitetində
apardığı yoxlamalar zamanı tərtib olunmuş yoxlama
aktının surətinin ona təqdim olunmasını
xahiş edib. Lakin Maliyyə Nazirliyi qanunvericilikdə
nəzərdə tutulmuş müddətdə cavab
verməyib.
Ağazadə 2006-cı il avqustun 1 -də informasiya
sorğusuna cavab verilməməsinin qanunsuz sayılması
ilə bağlı, Maliyyə Nazirliyinə qarşı şikayətlə
Nəsimi Rayon Məhkəməsinə müraciət edib.
Nəsimi Rayon Məhkəməsi şikayəti təmin
etməyib."Hər hansı idarə, müəssisə və
təşkilatda aparılmış yoxlama
nəticəsində tərtib olunmuş aktın surətinin
verilməsi "Kütləvi informasiya vasitələri haqqında"
və "İnformasiya əldə etmək haqqında" qanunlarda
nəzərdə tutulmayıb. Ona görə də,
məhkəmə hesab edir ki, ərizə əsassız
olduğundan təmin edilməməlidir", - qərarda qeyd
olunub.
Ərizəçinin qətnamədən
verdiyi apellyasiya və kassasiya şikayətləri təmin
olunmayıb.
Avropa Məhkəməsi Ağazadənin şikayəti
üzrə Azərbaycan dövlətinə qarşı bir
qərar qəbul edib. Jurnalistin digər bir şikayəti
isə, Avropa Məhkəməsinin icraatındadır.
Avropa Məhkəməsi Azərbaycana qarşı 16 qərar qəbul edib.
Məqalə müəllifi ilə əlaqə ünvanı:[email protected]
