Azərbaycan, Bakı, 15 yanvar / Trend , müxbir A.Hüseynbala/ Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurası 2009-cu ildə QHT layihələrinin maliyyələşdirilməsi ilə bağlı müsabiqə elan edib.
"Şura "Azərbaycan Respublikasının qeyri-hökumət təşkilatlarına dövlət dəstəyi Konsepsiyası"na uyğun olaraq, aşağıdakı istiqamətlər üzrə layihələrə üstünlük verəcək", - cümə axşamı Trend -a Şuradan bildirilib.
TrendNеws-un аrаyışı: Azərbaycan prezidenti Ilham Əliyev 2008-ci il aprelin 16-da Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurası üzvlərinin təyin edilməsi haqqında Sərəncam imzalayıb.
Məlumatda qeyd edilir ki, Şura gələn il 14 istiqamətdə QHT layihələrinin maliyyələşdirilməsini nəzərdə tutur. İnsan hüquqları və demokratiya istiqamətində nəzərdə tutulan ümumi fondun məbləği 120 min manat olacaq. QHT-lərin institusional inkişafı üçün də 120 min manat qrant verilməsi nəzərdə tutulur.
Ermənistan - Azərbaycan, Dağlıq Qarabağ münaqişəsi ilə bağlı Azərbaycanın ədalətli mövqeyinin xarici ölkələrdə və beynəlxalq təşkilatlarda təbliğı və müdafiəsi istiqamətində layihələrə ümumilikdə 90 min manat veriləcək.
Ailə, qadın və uşaq problemlərinin həllinə , eləcə də sosial problemlərin həllinə dəstək istiqamətində təqdim olunacaq layihələrə, müvafiq olaraq, 120 min manat qrant veriləcək.
Mədəniyyətin inkişafına dəstək, səhiyyənin inkişafı və əhalinin sağlamlığının qorunması ilə bağlı QHT layihələrinə ayrı-ayrılıqda 90 min manat verilməsi nəzərdə tutulur.
Ətraf mühitin mühafizəsi və təbii sərvətlərdən səmərəli istifadə istiqamətində təqim olunacaq layihələrə 100 min, gənclərin problemlərinin həllinə dəstək layihələrinə 90 min manat veriləcək.
Elm və təhsilin inkişafına dəstək, terrorizmə, narkomaniyaya, korrupsiyaya və insan alverinə qarşı mübarizədə QHT-lərin rolunun artırılması üçün nəzərdə tutulan layihələrə də , müvafiq olaraq, 100 min manat qrant nəzərdə tutulur.
Region QHT təşəbbüslərinin dəstəklənməsi istiqamətində işlənəcək layihələrə ümimilkdə 240 min manat veriləcək.
Sahibkarlığın inkişafının dəstəklənməsi üçün 70 min, qaçqın və məcburi köçkünlərin, əlil, veteran və şəhid ailələrinin sosial problemlərinin həllinə kömək məqsədilə 100 min manat qrant ayrılacaq.
QHT-lərin beynəlxalq tədbirlərdə iştirakına dəstək, QHT tərəfindən irəli sürülən ictimai əhəmiyyətli ideya və təşəbbüslərin davamlı olaraq dəstəklənməsi, zəruri tədbir, konfrans və seminarların, konsepsiya müddəalarından irəli gələn digər fəaliyyətlərin dəstəklənməsi məqsədilə, 2009-cu ildə 400 min manat nəzərdə tutulub.
Məlumatda bildirilir ki, hər layihə üçün maksimum məbləğ 20 min manat müəyyən edilib.
Ərizələr yanvarın 15-dən (həftənin I-V günlərində saat 10.00-dan 18.00-dək) Şuranın ofisində qəbul olunur.
Ərizələrin fevralın 15-dək qəbul olunacaq.
Məqalə müəllifi ilə əlaqə ünvanı: [email protected]
