Qırğızıstan, Bişkek, 24 yanvar / Trend müxbir R.Мəşədihəsənli/ Polad Bülbüloğlunun "Dədə Qorqud" baleti Qırğızıstanda səhnəyə qoyulacaq. Bu barədə bu gün Trend müxbirinə Qırğızıstanın Mədəniyyət və İnformasiya naziri Sultan Rayev məlumat verib.
Nazirin sözlərinə görə, "Dədə Qorqud" baletinin Bişkekdə səhnələşdirilməsi layihəsi Azərbaycanın və Qırğızıstanın Mədəniyyət Nazirliklərinin birgə layihəsi əsasında həyata keçiriləcək. "Bu il səhnələşdirilməsi planlaşdırılan əsərin bəzi məqamlarını dəqiqləşdirmək üçün yaxın vaxtlarda Moskvaya səfərim çərçivəsində Polad Bülbüloğlu ilə görüşəcəyəm" - deyə o vurğulayıb.
Rayev həmçinin Polad Bülbüloğlunun mart ayında Qırğızıstana gələrək "Dədə Qorqud" baletinin səhnələşdiriləcəyi vaxtı bildirəcəyini də sözlərinə əlavə edib.