Azərbaycan, Bakı, 30 yanvar / Trend , müxbir B.Həsənov/ Ermənilərin azərbaycanlılara qarşı törətdiyi Xocalı soyqırımı ilə bağlı həqiqətlər ABŞ konqresmenlərinə çatdırılacaq.
"Fevral ayında konqresmenlərlə görüşərək Xocalı soyqırımı ilə bağlı məlumatlar veriləcək. Bundan əlavə, konqresmenlərə Xocalı soyqırımı ilə bağlı video görüntülərin olduğu CD-lərin verilməsi də planlaşdırılıb", - cümə günü Nyu-Yorkdan telefonla Trend -a Türk-ABŞ Assosiasiyaları Federasiyasının prezidenti Kaya Boztepe bildirib.
Xocalı faciəsi 1992-ci ildə fevralın 26-dan 27-nə keçən gecə Ermənistan silahlı qüvvələri tərəfindən Azərbaycanın Xocalı şəhərində törədilib. Baş verən faciə zamanı 106-sı qadın və 83-ü uşaq olmaqla 613 nəfər öldürülüb, 1275 nəfər əsir götürülüb, 150 nəfər itkin düşüb, 487 nəfər isə əlil olub.
Boztepe həmçinin deyib ki, konqresmenlərlə görüşdə qondarma ermən soyqırımı ilə bağlı məsələ də müzakirə olunacaq.
"Erməni lobbisinə "erməni soyqırımı"nı tanıyacağı barədə söz vermiş Obama administratsiyasının hakimiyyətə gəlməsi ABŞ-dakı türk diasporunun işini daha da çətinləşdirib. Boztepe türk diasporunun mövqeyini Obamaya birbaşa çatdıracaqlarını da bildirib. "Biz Obamaya təbrik məktubu göndərdik və ən qısa zamanda onunla görüşmək istədiyimizi bildirdik", - deyə Boztepe əlavə edib. O, Obama ilə görüşün baş tutacağına əmin olduğunu və bunu önəmli bir fürsət kimi dəyərləndirdiklərini vurğulayıb.
Ermənistan və dünyanın müxtəlif ölkələrindəki erməni lobbisi Türkiyənin sələfi olan Osmanlı dövlətinin 1915-ci ildə Anadoluda yaşayan ermənilərə qarşı "soyqırım" həyata keçirdiyini iddia edir. İddialarını dünyada da qəbul etdirmək istəyən ermənilər bir sıra ölkələrdə qondarma soyqırım təbliğatını gücləndirərək, bəzi dövlətlərin parlamentlərində "erməni soyqırımı"nın tanınmasına nail olublar. Aprel ayında "soyqırım"ın ildönümü ilə bağlı olaraq erməni lobbisinin bir sıra dünya ölkələrinin parlamentlərində, xüsusilə də ABŞ konqresində fəaliyyətini gücləndirməsi gözlənilir.
"Erməni lobbisinin fəaliyyəti qarşısında biz öz mübarizəmizdən heç vaxt geri çəkilməyəcəyik", - deyə Boztepe bildirib.
Məqalə müəllifi ilə əlaqə ünvanı:[email protected]
