Azərbaycan, Bakı, 04 fevral/ Trend , müxbir A.Hüseynbala/ Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurası ötən il qrant verilən QHT-lərin monitorinqinin müddətini uzadıb.
"Biz 50-yə qədər Qeyri-Hökumət Təşkilatına mart ayına qədər vaxt vermişik. 140-dan çox QHT-nin monitorinqi isə başa çatıb", - çərşənbə günü Trеnd Nеws-a Azərbaycan Prezidenti yanında QHT-lərə Dövlət Dəstəyi Şurasının sədri, millət vəkili Azay Quliyev bildirib.
Trеnd Nеws-ın аrаyışı: Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurası 2009-cu ildə QHT-lərə növbəti maliyyə yardımını elan edib.
Şura bu il QHT-lərin dövlət və ictimai əhəmiyyət kəsb edən layihələrinə daha çox üstünlük verəcək.
15 sahənin hər biri üçün 120 min manat, hər layihə üçün isə maksimum 20 min manat nəzərdə tutulur.
Ötən il Şuraya daxil olan 190 layihədən 136-sı dekabrın sonlarınadək maliyyələşdirilib. Qalan 54 layihənin maliyyələşdirilməsi isə bu ilin martında başa çatdırılacaqdır. Həyata keçirilən layihələrdə 900-dən çox adam iştirak edib. 2008-ci ildə Şuraya daxil olan müraciətlərdən 15-i geri qaytarılıb.
Azərbaycan prezidenti Ilham Əliyev 2008-ci il aprelin 16-da Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurası üzvlərinin təyin edilməsi haqqında Sərəncam imzalayıb.
Azərbaycan Respublikası prezidentinin 2007-ci il 13 dekabr tarixli Fərmanı ilə təsdiq edilmiş "Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası haqqında Əsasnamə"yə uyğun olaraq, 11 nəfərdən ibarət tərkibdə fəaliyyət göstərəcək Şura üzvlərindən 3-ü dövlət orqanlarının nümayəndələrindən, 8-i isə Qeyri-Hökumət Təşkilatlarının irəli sürdüyü namizədlərdən təyin edilib.
Milli QHT Forumunun кеçmiş prezidenti Azay Quliyev аprеlin 21-də Prezident yanında Qeyri-Hökumət Təşkilatlarına Dövlət Dəstəyi Şurasının sədri seçilib.
Şura sədrinin müavini vəzifələrinə isə Prezidentin Icra Aparatı İctimai-siyasi məsələlər şöbəsinin İctimai-siyasi təşkilatlarla iş sektorunun müdiri Tahir Süleymanov və Maliyyə Nazirliyinin Sosial sahələrin maliyyəsi şöbəsi müdirinin müavini Vüqar Məcidli seçilib.
Quliyev deyib ki, 2008-cu ildə qrant verilən QHT-lərə yenidən vəsait ayrılması onların ötənilki layihələri necə yerinə yetirmələrindən asılı olacaq. "Biz ilk növbədə təqdim olunan yeni layihələrin ictimai əhəmiyyətini nəzərə alacağıq", - Şura sədri əlavə edib.
Onun sözlərinə görə, yenidən qrant almaq arzusunda olan QHT-lərin 2008-ci ildə verilən maliyyə vəsaitini hansı məqsədlər üçün sərf etməsindən də çox şey asılıdır. "Əgər hansısa QHT vəsaiti aidiyyatı üzrə xərcləməyibsə, deməli, yenidən qran ayrılması mümkün deyil", - Quliyev qeyd edib.
Məqalə müəllifi ilə əlaqə ünvanı: [email protected]
