Azərbaycan, Bakı, 31 mart / Trend , müxbir K.Zərbalıyeva /
Aprelin 1-də İctimai Televiziyanın "İşgüzar zaman: hüquq müstəvisində" verilişində "İnzibati icraat haqqında" qanununun müzakirəsi keçiriləcək.
Almaniya Texniki Əməkdaşlıq Cəmiyyətindən (GTZ) çərşənbə axşamı Trend -a verilən məlumata görə, müzakirələrdə Milli Məclisin İnzibati və hərbi qanunvericilik şöbəsinin müdir müavini Səyyad Kərimov, şöbənin baş müşaviri İlqar Cəfərov, vəkil Elçin Usub və "Azərbaycanda məhkəmə və hüquq islahatlarının dəstəklənməsi" layihəsinin altı il rəhbəri olmuş, hazırda AFR Aşağı Saksoniya Torpağı Ədliyyə Nazirliyinin Hakimlərin Seçki Komitəsinin rəhbəri vəzifəsində çalışan Thomas Herrmann iştirak edəcəklər.
"İnzibati icraat haqqında" qanun Azərbaycanın qanunvericilik təcrübəsində ilk dəfə olaraq dövlət hakimiyyəti orqanları ilə münasibətlərdə vətəndaşlarının hüquqlarının müdaifəsini özündə ehtiva edir. Qanun vətəndaşların şikayət və müraciətlərinə baxan dövlət orqanlarının öhdəlik və məsuliyyətini müəyyən edir, fiziki və hüquqi şəxslərə hüquqi yardım göstərilməsindən imtinanı inzibati orqanlara qadağan edir, hamının qanun və inzibati orqan qarşısında bərabərliyini təsbit edir.
"İnzibati icraat haqqında" qanunun 2010-cu il yanvarın 1-dən qüvvəyə minməsi gözlənir.
Qanun qüvvəyə minənədək qanunun tətbiqi zamanı yaranan mübahisələri tənzimləyən İnzibati Prosessual Məcəllə qəbul ediləcək.
Hazırda inzibati mübahisələrə aid olan işlər üzrə ədalət mühakiməsini həyata keçirən hakimlərin hazırlanması gedir. Qanun Milli Məclisdə ikinci oxunuşdan keçib.
Məqalə müəllifi ilə əlaqə ünvanı:[email protected]
