Azərbaycanda müharibədən zərər çəkmişlərin hüquqlarının Avropa Məhkəməsində müdafiəsi üzrə proqram həyata keçiriləcək
Azərbaycan, Bakı, 22 aprel / Trend , müxbir K.Zərbalıyeva /
Azərbaycanda qaçqınların, məcburi köçkünlərin, əsirlikdə və girovluqda saxlanmış şəxslərin İnsan Haqları üzrə Avropa Məhkəməsində müdafiəsinin həyata keçirilməsi üçün proqramın icrasına başlanılıb.
Hüquq Maarifçiliyi Cəmiyyətindən çərşənbə günü Trend -a verilən məlumata görə, Demokratiya və İnsan Hüquqları Resurs Mərkəzi tərəfindən həyata keçirilən proqram Prezident Yanında QHT-ə Dövlət Dəstəyi Şurasının ayırdığı qrant əsasında maliyyələşdiriləcək.
Qaçqınlar, məcburi köçkünlər, əsirlikdə və girovluqda saxlanmış şəxslər onların özlərinin və yaxınlarının mülkiyyətinə, səhhətinə və mənəviyyatına dəymiş zərərlər barədə şikayətlərini Mərkəzin ofisinə təqdim edə bilər.
Ərizəçilərin Ermənistanda və ya erməni işğalında olan ərazidə qalmış əmlaka mülkiyyətini təsdiq edən sənədlərin, əsirlikdə və ya girovluqda saxlanılması, orada işgəncələrə məruz qalması və ya xəsarət alması barədə sənədlərin (milli və beynəlxalq təşkilatların rəsmi sənədləri, tibbi arayışlar və s.) təqdim olunması da önəmlidir.
Bu şəxslərə hüquqi yardım Vəkillər Kollegiyasının üzvü, beynəlxalq sertifikatlı mütəxəssis tərəfindən göstəriləcək.
Azərbaycanın Avropa Məhkəməsindəki hakimi Xanlar Hacıyev ötən ilin dekabrında jurnalistlərə müsahibəsində bildirib ki, Məhkəmənin gündəliyində bu qəbildən olan 1 şikayət - Laçın rayonundan məcburi köçkün düşmüş 6 nəfərin Ermənistana qarşı işi var.
Azərbaycana qarşı erməni əsilli vətəndaşlar tərəfindən 2 şikayət Məhkəmə tərəfindən icraata qəbul edilib.
Azərbaycanlı hakim bu işlərlə bağlı yekun qərarın qəbulunun uzun müddət çəkəcəyini deyib.
"Məhkəmələrin bu işlərlə bağlı qəbul etdiyi qərarlar pilot qərarlar olacaq. Bu qərarların qəbulundan sonra Avropa Məhkəməsinə bu qəbildən olan şikayətlərin sayı artacaq. Həm də bu məsələnin siyasi tərəfi də var. Ona görə də Avropa Məhkəməsi qeyd olunan şikayətlərlə bağlı məhkəmə qərarlarının qəbuluna ehtiyatla yanaşır", - deyə Hacıyev vurğulayıb.
Məqalə müəllifi ilə əlaqə ünvanı: [email protected]
