Azərbaycan, Bakı, 03 avqust / Trend , muxbir H.Bağırov /
Azərbaycanda bank rəhbərinə hökm oxunub.
"Kapitalbank"ın Qobustan rayon filialının müdiri Pərvin Kazımovun məhkəməsi başa çatıb. Məhkəmə təqsirləndirilən şəxsə cəza təyin edərkən dəymiş ziyanın ödənilməsini nəzərə alıb. Təqsirləndirilən şəxsin barəsində Cinayət Məcəlləsinin Şərti məhkum etmə (70) maddəsi tətbiq edilib və Kazımov 4 il şərti cəza alaraq, məhkəmə zalından azadlığa buraxılıb.
Kazımov öz qulluq mövqeyindən sui-istifadə etməklə bankın kredit komitəsindən müvafiq qaydada icazə almadan, digər müştərilər qarşısında olan öhdəliklərin təmini üçün nəzərdə tutulmuş və bu məqsədlə filiala göndərilmiş puldan 65000 manatı mənimsəyib. Bu məqsədlə o, Sumqayıt şəhərində yerləşən, dəyəri 245000 manat təşkil edən qeyri-yaşayış sahəsini kreditin qaytarılmasının təminatı kimi ipoteka yüklü edilməsi barədə "İnterstar" beynəlxalq şirkətinin direktoru Arzu Mirzəyevin adına sonuncuya 12 ay müddətinə 24 faizlə 65000 manat kredit verilməsi barədə kredit və ipoteka müqavilələrinin bağlanılmasını təşkil edib. Bununla bağlı digər sənədləşmələrin aparılmasını təşkil edərək həmin pulun Mirzəyevə verilməsi barədə xəzinə məxaric orderi tərtib etdirib və ona imza etdirib, lakin göstərilən pulu özü götürüb mənimsəməklə özgə əmlakını külli miqdarda talayıb.
Kazımov Baş Prokurorluğun Korrupsiyaya Qarşı Mübarizə İdarəsi tərəfindən başlanmış cinayət işi ilə bağlı həbs edilib.
Məqalə muəllifi ilə əlaqə unvanı: [email protected]
...
