Azərbaycan, Bakı, 5 avqust / Trend , muxbir K.Zərbalıyeva /
"Amnesty İnternational" təşkilatı dövlətə xəyanətə görə məhkum olunmuş baş redaktorun səhhətinin ağırlaşmasından narahatlıq ifadə edən bəyanat yayıb.
"Tolışi-Sədo" (Talışın Səsi) qəzetinin 10 il həbs cəzası almış 67 yaşlı baş redaktoru Novruzəli Məmmədovun Hüquqlarını Müdafiə Komitəsinin rəhbəri Hilal Məmmədovun çərşənbə günü Trend -a verdiyi məlumata görə, təşkilat N.Məmmədovun səhhətinə görə lazımi şərait yaradılması və onun yaxşı şəraiti olan xəstəxanaya köçürülməsi üçün ictimaiyyətin Prezident İlham Əliyevə və ədliyyə naziri Fikrət Məmmədova müraciət etməsini xahiş edib.
Komitə sədri bildirib ki, 2009-cu ilin iyun ayında həbsxana həkimi N.Məmmədova katarakta, qalxanvari və prostat vəzilərinin əməliyyatı diaqnozunu qoyub.
Həkim onun bu vəziyyətdən xilas olması üçün 3 cərrahiyyə əməliyyatının keçirilməsini məsləhət görüb. O, iyulun 28-də Ədliyyə Nazirliyi Penitensiar Xidmətin müalicə müəssisəsinə köçürülüb.
H.Məmmədov bildirib ki, baş redaktorun çoxlu ağrıları, hərəkət məhdudluğu, nəfəs almada və danışmaqda çətinliyi var.
N.Məmmədov görüş zamanı ailəsinə və vəkilinə bildirib ki, xəstəxanada şərait və tibbi xidmət pis vəziyyətdədir.
Ədliyyə Nazirliyinin Penitensiar Xidmətinin ictimaiyyətlə əlaqələr şöbəsinin rəhbəri Mehman Sadıqov Trend -a bildirib ki, N.Məmmədovla dünən görüşüb. Sadıqovun sözlərinə görə, baş redaktorun müayinələri davam edir və onun səhhəti xəstəxananın həkimlərinin nəzarəti altındadır.
Şöbə rəhbəri deyib ki, həkimlərin rəyinə görə, Məmmədovun həyatı üçün təhlükə yoxdur. "Bir-iki günə müayinələr yekunlaşacaq və ona müalicə yazılacaq. Əgər onun əməliyyata ehtiyacı olarsa, bizim müəssisədə kifayət qədər peşəkar həkimlər və cərrahlar var. Məmmədov və ailəsi istəsə kənardan cərrah dəvət edə bilərlər və buna şərait yaradılacaq", - deyə Sadıqov vurğulayıb.
Trend -un arayışı: Milli Elmlər Akademiyasının Dilçilik İnstitutunun bölmə müdiri və "Tolışi-Sədo" qəzetinin baş redaktoru Məmmədov və qəzetin məsul katibi Quliyev 2007-ci il fevralın əvvəllərində həbs olunublar.
Məhkəmənin hökmü ilə Məmmədov 10 il, Quliyev isə 6 il müddətinə azadlıqdan məhrum ediliblər. Onlar Azərbaycan Cinayət Məcəlləsinin 274-cü (dövlətə xəyanət) və 283-cü (milli, irqi, dini düşmənçiliyi yayma) maddələri ilə ittiham olunublar.
Məqalə muəllifi ilə əlaqə unvanı: [email protected]
