Azərbaycan, Bakı, 23 oktyabr / Trend , muxbir H.Bağıov/
Azərbaycan məhkəməsi yaşayış binasında insan ölümü ilə nəticələnən partlayışda təqsirli bilinən şəxsin cəzasını yüngülləşdirib.
Trend -un məlumatına görə, Bakı Apellyasiya Məhkəməsi Nəsimi rayonu Cavadxan küçəsindəki 5 mərtəbəli binada baş verən partlayışla bağlı təqsirləndirilən Şirvan şəhər sakini Orxan Əliyevin və rayon Qaz İstismarı Şöbəsinin əməkdaşı Rafət Qurbanovun apellyasiya şikayətinə baxıb.
Bu il yanvarın 16-da Nəsimi rayonu Cavadxan küçəsi, 30 ünvanında yerləşən beşmərtəbəli yaşayış binasının 60-cı mənzilində qaz sızmasından partlayış baş verib.
Müəyyyən edilib ki, Nəsimi rayonu Cavadxan küçəsi 30 ünvanında yerləşən beşmərtəbəli yaşayış binasının 60-cı mənzilində kirayədə yaşayan Orxan Əliyev hamamdakı su qızdırıcısına qaz xəttini rezin borudan istifadə etməklə çəkib. Rezin boruda baş verən sızma isə partlayışla nəticələnib və partlayış zamanı 5 nəfər ölüb, 10 nəfər yaralanıb.
Məhkəmə təqsirləndirilən Əliyevin apellyasiya şikayətini qismən təmin edib. Əliyevin barəsində seçilmiş 6 illik həbs cəzası dəyişdirilərək, onun barəsində 5 il azadlıqdan məhrum etmə cəzası təyin edilib. Məhkəmənin qərarı ilə Əliyev cəzasını ümumi rejimli cəzaçəkmə müəssisəsində deyil, Məntəqə Tipli Cəza Çəkmə Müəssəsində çəkəcək.
Bakı Apellyasiya Məhkəməsi Qurbanovun apellyasiya şikayətini təmin etməyib.
Təqsirləndirilən şəxslər Cinayət Məcəlləsinin ehtiyatsızlıqdan iki və daha çox adam öldürmə (124.2), ehtiyatsızlıqdan sağlamlığa az ağır zərər vurma (131.1), ehtiyatsızlıqdan sağlamlığa ağır zərər vurma (131.2), özgənin əmlakını ehtiyatsızlıqdan məhv etmə və ya zədələmə (187.3) maddələri ilə ittiham olunublar.
Nəsimi rayon Məhkəməsinin hökmü ilə Orxan Əliyev cəzasını ümumi rejimli cəza çəkmə müəssəsində çəkməklə 6 il, Rafət Qurbanov isə cəzasını məntəqə tipli cəzaçəkmə müəssisəsində çəkməklə 4 il müddətinə azadlıqdan məhrum edilmişdilər.
Məqalə müəllifi ilə əlaqə ünvanı: [email protected]
