Azərbaycan, Bakı, 27 oktyabr / Trend , muxbir H.Bağırov/
Azərbaycan Beynəlxalq Unversitetinə (ABU) və digər ali məktəblərə qanunsuz yolla tələbə qəbul etdirməkdə ittiham olunan şəxslərin apellyasiya şikayətinə baxılıb.
Trend -un məlumatına görə, çərşənbə axşamı Bakı Apellyasiya Məhkəməsində Binəqədi rayon Polis İdarəsinin keçmiş əməliyyat müvəkkili Müşfiq Muradovun və ABU-nun rektoru Elşad Abdullayevin qardaşı Mahir Abdullayevin katibəsi olmuş Bənövşə Hacıyevanın apellyasiya şikayəti üzrə qərar elan edilib.
Məhkəmə Muradovun barəsində çıxarılmış hökmü dəyişdirib və onun cəzası 4 ildən 2 il 6 aya endirilib. Hökmün digər təqsirləndirilən barəsindəki hissəsi isə dəyişdirilmədən saxlanılıb.
Ağır Cinayətlərə Dair İşlər üzrə Məhkəmədə Cinayət Məcəlləsinin mütəşəkkil dəstə tərəfindən dələduzluq etmək (178.3.1) maddəsi ilə ittiham olunan Muradovun 4 il müddətinə azadlıqdan məhrum etmə, Hacıyevanın isə 3 il şərti cəza alması barədə hökm çıxarılıb. Hacıyeva məhkəmə zalından azadlığa buraxılıb.
Təqsirləndirilən şəxslər 2005-cü ildə bir qrup şəxslə ABU-ya Tələbə Qəbulu üzrə Dövlət Komissiyasından kənar tələbələr götürülməsinə başlayıblar. Onlar əvvəlcə tələbələri Dağstanda olan universitetlərdən birinə qəbul etdirməyi, sonra isə onların ABU-ya köçürüləcəyini vəd ediblər. Təqsirləndirilən şəxslər 2005-2007-ci illər ərzində 100-dən çox vətəndaşı aldadaraq, pullarını mənimsəyiblər. Zərərçəkmişlərin şikayətindən sonra təqsirləndirilən şəxslər Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin əməkdaşları tərəfindən tutulublar.
Məqalə müəllifi ilə əlaqə ünvanı: [email protected]
