Azərbaycan, Bakı, 05 noyabr / Trend , müxbir K.Zərbalıyeva/
İranda həbsdə olan azərbaycanlı alimə girov müqabilində zaminə buraxılması təklif olunub.
Alimin Hüquqlarının Müdafiə Komitəsinin rəhbəri Soltanhəmid Məlikov cümə axşamı Trend -a bildirib ki, cinayət işinin istintaqını aparan müstəntiq Rəşid Əliyevə 100 min dollar məbləğində girov qoymaqla zaminliyə buraxılmaq imkanının olduğunu bildirib.
Müdafiə Komitəsi sədrinin sözlərinə görə, Əliyev bu gün ailəsi ilə telefon əlaqəsi yaradıb və bu barədə ailəsinə məlumat verib.
Alim bildirib ki, əvvəllər çalışdığı "Sazan Electronics Industry Company" şirkətinin rəhbəri tələb olunan məbləğin ödənilməsinə razılıq verib.
Bakı Dövlət Universitetinin Fizika Problemləri Elmi-Tədqiqat İnstitutunun Bioloji sistemlər fizikası laboratoriyasının aparıcı fizik-mühəndisi Rəşid Əliyev İranın "Sazan Elektronics Industry Company" şirkətinin dəvəti və BDU-nun razılığı əsasında başlanmış əməkdaşlıq müqaviləsi çərçivəsində 2006-2008-ci illərdə həmin şirkətdə çalışıb. Şirkətin rəhbərliyi azərbaycanlı alimə İranda daimi qalıb işləməsini dəfələrlə təklif etsə də, o, bu təklifləri qəbul etməyib və respublikaya qayıdıb. Şirkətin direktoru Eftexarinin təkidli xahişindən sonra Əliyev sonuncu dəfə ötən il oktyabrın 5-də qısa müddətə İrana qayıdıb. Oktyabrın 6-da isə onu viza problemini bəhanə gətirərək həbs ediblər.
İranın "Sazan Elektronics Industry Company" şirkətinin rəhbəri Abbas Eftexari öncə Trend -a bildirib ki, Əliyevin həbsinin həmin şirkətlə Bakı Dövlət Universiteti arasında bağlanmış müqavilə ilə heç bir əlaqəsi yoxdur.
"Onu milli təhlükəsizlik məsələsi ilə bağlı həbs ediblər. Daha açıq desəm, casusluq məsələsinə görə həbs olunub", - deyə Eftexari bildirib.
Azərbaycan Ədliyyə Nazirliyi İranda həbs edilən azərbaycanlı lazer mütəxəssisinin işi ilə bağlı bu ölkənin müvafiq qurumuna sorğu göndərib.
Əliyev hazırda Evin həbsxanasında beşinci korpusda saxlanılır.
Əliyev 38 yaşında BDU-da elmi fəaliyyətini müvəqqəti dayandıraraq könüllü hərbi xidmətə gedib. 1999-cu ilədək N saylı xüsusi təyinatlı hissədə rabitə sistemi qurub, xüsusi təyinatlı lazer texnikasının hərbi hissədə sınaqlarının təşkili və keçirilməsində yaxından iştirak edib.
Sərhəd Qoşunlarının "Keşikçi gəmisi", Ekologiya və Təbii Sərvətlər Nazirliyinin "Tədqiqat gəmisi", "Balıq mühafizə gəmisi"nin əsaslı təmirinə cəlb olunub.
İranın Azərbaycandakı səfirliyi də məlum məsələ ilə bağlı açıqlama vermir.
Məqalə müəllifi ilə əlaqə ünvanı: [email protected]