Azərbaycan, Bakı, 12 noyabr / Trend , müxbir H.Bağırov/
Azərbaycanda almaniyalı iş adamını oğurlamaqda təqsirli bilinən Azərbaycan vətəndaşlarının məhkəməsi başlayıb.
Bu il avqustun 10-da Türkiyə və Gürcüstan vətəndaşlığını daşıyan, Almaniyada yaşayan iş adamı Cavatay Yaman Zaqatala rayonunun Car kəndi ərazisində yerləşən "Ləzzət" istirahət guşəsində girov saxlanılıb.
Zaqatala rayon polis şöbəsi əməkdaşlarının keçirdiyi əməliyyat tədbirləri nəticəsində iş adamını girov saxlamaqda təqsirli bilinən Naxçıvan Muxtar Respublikasının vətəndaşı Həsən Cabbarov, Bakı şəhər sakinləri Sabir Sadiqi və Qulu Muxtarov avqustun 13-də saxlanılıblar. Adıçəkilən şəxslərdən silah-sursat və 1 ədəd qandal götürülüb.
Araşdırmalar zamanı məlum olub ki, adıçəkilən şəxslər Yamanı 10 gün əvvəl girov götürüblər. Əvvəllər həmin şəxslərlə biznes əlaqəsində olan Yaman onlara külli miqdarda pul borcu olub. Borcu qaytara bilmədiyi üçün Yaman girov götürülüb. Bir müddət Qax rayonunda, sonra isə Zaqatalada yerləşən "Ləzzət " istirahət mərkəzində girov saxlanılan Yamana işgəncə verildiyi qeyd edilir.
Trend -un məlumatına görə, cümə axşamı Ağır Cinayətlərə Dair İşlər üzrə Məhkəmədə Naxçıvan Muxtar Respublikasının vətəndaşı Həsən Cabbarov, Bakı şəhər sakinləri 56 yaşlı Sabir Sadiqi və 45 yaşlı Qulu Muxtarovun cinayət işi üzrə məhkəmə prosesində zərərçəkmiş Türkiyə vətəndaşı Cavatay Yamanın nümayəndəsi Şamil Muxtarov cinayət işinin ibtidai istintaqa qaytarılması barədə vəsatət verib.
Muxtarov cinayət işinin yekunlaşdırılması barədə onlara məlumat verilmədiyini bildirib.
Hakim zərərçəkmiş şəxsin nümyəndəsinə cinayət işi ilə tanış olması üçün şərait yaradılacağını bildirib.
Məhkəmədə ifadə verən Qulu Muxtarov elan olunmuş ittiham üzrə özünü qismən təqsirli bilib.
Qulu Muxtarov deyib ki, Türkiyə vətəndaşını pullarını geri almaq üçün saxlayıblar. Digər təqsirləndirilən şəxslər də elan olunmuş ittiham üzrə özlərini qismən təqsirli biliblər.
Məqalə müəllifi ilə əlaqə ünvanı: [email protected]
