Azərbaycan, Bakı, 18 noyabr / Trend , müxbir H.Bağırov/
Özünü Nazirlər Kabinetinin şöbə müdiri kimi təqdim edən şəxsin cəzası azaldılıb.
Trend -un məlumatına görə, çərşənbə günü Bakı Apelyasiya Məhkəməsində özünü Nazirlər Kabinetinin şöbə müdiri kimi təqdim edən Hidayət Məmmədov və onun oğlu Elvin Məmmədovun barəsində Ağır Cinayətlərə Dair İşlər üzrə Məhkəmənin çıxardığı hökm dəyişdirilib. Məhkəmənin qərarı ilə Hidayət Məmmədovun cəzası 10, Elvin Məmmədovun cəzası isə 9 ilə endirilib.
Ağır Cinayətlərə Dair İşlər üzrə Məhkəmənin hökmü ilə Hidayət Məmmədov 12 il, oğlu Elvin Məmmədov isə 10 il müddətinə azadlıqdan məhrum edilmişdi.
Təqsirləndirilən şəxslər Cinayət Məcəlləsinin külli miqdarda ziyan vurmaqla dələduzluq etmə (178.3.2) və əvvəllər talama və ya hədə-qorxu ilə tələb etməyə görə iki dəfə və ya daha çox məhkum edilmiş şəxs tərəfindən dələduzluq etmə (178.3.3) maddələri ilə təqsirli bilniblər.
Hidayət Məmmədov özünü Nazirlər Kabnetinin "Sərmayə işləri ilə məşğul olan şöbəsinin rəisi" kimi təqdim edib və Hafiz Rüstəmovu rayonlardan birinə İcra Hakimiyyətinin başçısı təyin ediləcəyi ilə aldadaraq ondan 50 min ABŞ dolları alıb.
Məmmədov Hafiz Rüstəmovun icra başçısı təyin edilməsi barədə danışıqların nəticəsinin alındığını bildirərək, onu daha yüksək vəzifəyə, Maliyyə Nazirliyi sistemində rəhbər vəzifələrdən birinə təyin etdirməyi vəd edib və buna görə də ondan daha 50 min ABŞ dolları alıb. O, zərərçəkmişdən ümumilikdə 100 min ABŞ dolları alaraq mənimsəyib.
Təqsirləndirilən şəxslər vətəndaşların - Vüsal Rüstəmovun 35 min, Sabir Cəfərovun 90 min, Dilqəm Kazımovun 3 min, Elam Rüstəmovun 15 min ABŞ dollarını mənimsəyib.
Hidayət Məmmədov 2002-ci ildə Cinayət Məcəlləsinin külli miqdarda mənimsəmə və israf etmə (179.3.2) və saxta sənəd hazırlama (320.1) maddələri ilə ittiham olunaraq Ağır Cinayətlərə Dair İşlər üzrə Məhkəmənin hökmü ilə 8 il azadlıqdan məhrum edilmişdi. Həmin il iyunun 11-də CM-nin şərti məhkum etmə (70) maddəsi tətbiq edilməklə Apelyasiya Məhkəməsinin qərarı ilə azad edilib.
Məqalə müəllifi ilə əlaqə ünvanı: [email protected]