Azərbaycan, Bakı, 02 dekabr / Trend , müxbir A.Hüseynbala/
Azərbaycan Parlamentində qadınlara qarşı zorakılıqla bağlı ictimaiyyətə müraciət qəbul edilib.
"Azərbaycan dövləti qadınlara qarşı zorakılığın aradan qaldırılması istiqamətində siyasi iradə nümayiş etdirib və bir çox təsirli tədbirlər həyata keçirib", - Trend -un məlumatına görə, çərşənbə günü Milli Məclisdə qadınlara qarşı zorakılığın aradan qaldırılması gününün 10 illiyinə həsr olunan ictimai dinləmələrin iştirakçılarının Azərbaycan ictimaiyyətinə müraciətində bildirilir.
Sənəddə qeyd edilir ki, tədbirlərə baxmayaraq, bütün dünyada olduğu kimi Azərbaycanda da qadınlara qarşı zorakılıq ictimai və siyasi gündəmin ən aktual problemlərindən biri olaraq qalır. "Ermənistanın ölkəmizə silahlı təcavüzü nəticəsində minlərlə qadın həlak olmuş, yaralalanmış, ağlasığmaz işgəncələrə və təhqirlərə məruz qalmışdır. Bu gün də yüzlərlə əsir və girov qadınımız Ermənistanda və Azərbaycanın işğal edilmiş ərazilərində dözülməz şəraitdə saxlanılır, istismar edilir və digər zorakılıq əməllərinə məruz qalırlar", - müraciətdə vurğulanır.
Tədbir iştirakçılarının fikrincə, cəmiyyət qadınlara zorakılığa qarşı daha çox dözümsüzlük nümayiş etdirməli və daha aktiv fəaliyyət göstərməlidir. "Bu sahədə geniş maarifləndirmə işinin aparılmasına, mövcud durumun obyektiv qiymətləndirilməsi üçün əhatəli monitorinqin həyata keçirilməsinə ciddi ehtiyac var. Bu fəaliyyətin gerçəkləşməsində geniş ictimaiyyətin və xüsusilə də qeyri-hökumət təşkilatlarının rolu danılmazdır", - müraciətdə qeyd edilir.
Sənəddə bildirilir ki, qadınlara qarşı zorakılığın aradan qaldırılmasının ən effektiv yolu qadınlarımızı gücləndirməkdir. "Biz, bu müraciəti imzalayanlar Avropa Şurasının qadınlara qarşı zorakılıqla mübarizə kampaniyasını dəstəklədiyimizi bir daha bəyan edir, dövlətimizi və cəmiyyətimizi bu işdə daha qətiyyətli, barışmaz və fəal olmağa çağırırıq", - müraciətdə vurğulanır.
Məqalə müəllifi ilə əlaqə ünvanı: [email protected]