Azərbaycanda dövlət qulluqçularının etik davranışı ilə bağlı məlumatlar korrupsiya ilə bağlı hesabata daxil ediləcək
Azərbaycan, Bakı, 21 dekabr / Trend , müxbir K.Zərbalıyeva/ Azərbaycanda dövlət qulluqçularının etik davranışı ilə bağlı dövlət orqanlarından toplanan məlumatlar Korrupsiyaya qarşı Mübarizə üzrə Dövlət Komissiyasına təqdim olunacaq.
Trend -un məlumatına görə, Dövlət Qulluğu Məsələləri üzrə Komissiyanın sədri Bəhram Xəlilov bazar ertəsi jurnalistlərə bildirib ki, məlumatların toplanılması prosesi davam edir.
"Üçüncü və dördüncü rübə dair bütün dövlət orqanlarından-həm mərkəzi, həm də yerli icra hakimiyyəti orqanlarından bu məlumatlar Komissiyaya daxil olur. Həmin məlumatlar əsasında ümumiləşdirmə aparılacaq",-deyə Xəlilov bildirib.
Komissiya sədrinin sözlərinə görə, həmin məlumatlar Korrupsiyaya qarşı Mübarizə üzrə Dövlət Komissiyasının hazırlayacağı hesabata daxil ediləcək və bu barədə məlumatlar ictimaiyyətə açıqlanacaq.
