Azərbaycan, Bakı, 11 may /Trend, müxbir M.Əliyev/
London Olimpiya Oyunları Təşkilat Komitəsi (LOCOG) tərəfindən təşkil olunan "Beynəlxalq İdman Həyəcanı" proqramı Azərbaycanda çərşənbə axşamı öz işini yekunlaşdırıb.
"Azərbaycanda "Beynəlxalq İdman Həyəcanı" proqramı çox fəal həyata keçirilib, çoxlu sayda idmançı, məşqçi cəlb olunub", - bu barədə jurnalistlərə gənclər və idman naziri Azad Rəhimov bildirib.
Onun sözlərinə görə, proqramın həyata keçirilməsində əsas məqam əlil uşaqıların idmana cəlb olunmasından ibarət olub.
Azərbaycanda iki il ərzində fəaliyyət göstərən "Beynəlxalq İdman Həyəcanı" proqramı təhsil, idman və inkişaf istiqamətləri üzrə Gənclər və İdman Nazirliyi, Təhsil Nazirliyi, Milli Olimpiya Komitəsi, Milli Paralimpiya Komitəsi, Azərbaycan Müəllimlər İnstitutu, Azərbaycan Futbol Federasiyaları Assosiasiyası, Uşaq Futbol Federasiyası, Azərbaycan Atletika Federasiyası, Azərbaycan Voleybol Federasiyası, Bədən Tərbiyəsi və İdman Akademiyası ilə əməkdaşlıq edib.
Hərəkatın bağlanış mərasimində Beynəlxalq Paralimpiya Komitəsinin rəhbəri Filip Kraveni iştirak edib.
