Azərbaycan, Bakı, 1 iyun /Trend, müxbir H.Bağırov/
Ermənistanın xüsusi xidmət orqanlarl ilə işbirliyinə görə məhkum olunmuş hərbçiyə yeni ittiham irəli sürülüb. O, əsgərlərə işgəncə vermək, hədə-qorxu gəlməklə əsgərlərin silahlarını ələ keçirməkdə günahlandırılır.
Trend-in məlumatına görə, bu gün Ağır Cinayətlərə Dair İşlər Üzrə Hərbi Məhkəmədə Müdafiə Nazirliyinin Gədəbəy rayonunda yerləşən "N" saylı hərbi hissəsinin hərbi qulluqçusu, gizir Anar Allahverdiyevin cinayət işi üzrə keçirilən prosesdə prokuror ittiham aktını elan edib.
Məhkəmədə təqsirləndirilən şəxs qismində ifadə verən Allahverdiyev elan olunmuş ittiham üzrə özünü təqsirli bilməyib. O deyib ki, əsgərlərə işgəncə verməyib və onlardan silah-sursat tələb etməyib.
Cinayət Məcəlləsinin dövlətə xəyanət (274), döyüş növbəsi çəkmə qaydalarını pozma (338.1), hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə (341.1) maddələri ilə ittiham olunan Allahverdiyev bir müddət əvvəl Ağır Cinayətlərə Dair İşlər Üzrə Hərbi Məhkəmənin hökmü ilə 14 il 6 ay müddətinə azadlıqdan məhrum edilib. Həmin ittihama görə, Allahverdiyev Ermənistan xüsusi xidmət orqanları tərəfindən əməkdaşlığa cəlb edilib və xidmət etdiyi hərbi hissə ilə bağlı əhəmiyyətli sirləri düşmən tərəfə ötürüb. Bundan başqa, o, tabeliyində olan əsgərləri erməni xüsusi xidmət orqanları ilə əlaqə yaratmağa məcbur edib.
Həbsdə olduğu müddətdə Allahverdiyevain xidmət etdiyi hərbi hissədə əsgərlərə işgəncə verməsi, onlardan hədə-qorxu yolu ilə döyüş silah-sursatlarını tələb etməsi faktları müəyyən edilib və həmin faktlar üzrə onun barəsində cinayət işi başlayıb.
Allahverdiyevin erməni xüsusi xidmət orqanlarına casusluq etməyə məcbur etdiyi hərbi qulluqçuların barəsində başlanan cinayət işi üzrə qurulan məhkəmədə bu faktlar aşkar edilib.
Allahverdiyev Cinayət Məcəlləsinin qabaqcadan əlbir olan bir qrup şəxs tərəfindən odlu silahı, döyüş sursatını, partlayıcı maddələri və qurğuları talama və ya hədə-qorxu ilə tələb etmə (232.2.1) maddəsi ilə ittiham edilir.