Azərbaycan, Bakı, 1 sentyabr /Trend, müxbir H.Bağırov/
Azərbaycanda ali məktəblərə qanunsuz yolla tələbə düzəltmək adı ilə vətəndaşları aldadan dəstə üzvlərinin apelyasiya şikayəti təmin edilməyib.
Bakı Apelyasiya Məhkəməsindən Trend-ə verilən məlumata görə, Bakı şəhər sakinləri - Rauf Dadaşovun, Sücayət Məmmədovanın və Vaqif Şahbazovun apelyasiya şikayəti üzrə qərar elan edilib.
Qərara görə, təqsirləndirilən şəxslərin apelyasiya şikayətləri təmin edilməyib və Ağır Cinayətlərə dair İşlər üzrə Məhkəmənin hökmü qüvvədə saxlanılıb.
Ağır Cinayətlərə dair İşlər üzrə Məhkəmənin hökmü ilə Dadaşov 11 il, Məmmədov 10 il müddətinə azadlıqdan məhrum edilib. Şahbazov isə 6 il 7 ay müddətinə şərti cəza alaraq, məhkəmə zalından azad edilib.
Təqsirləndirilən şəxslər 40 nəfər abituriyenti Tələbə Qəbulu üzrə Dövlət Komissiyasının təşkil etdiyi test imtahanlarından kənar ali məktəbə düzəltmək adı ilə aldadaraq onların külli miqdarda əmlakını mənimsəyiblər.
Dəstənin aldatdığı zərərçəkmişlərdən biri də tikinti şirkətinin rəhbəri olub. Dadaşov 2007-ci ildə "Nəcibə" MMC tikinti şirkətinin rəhbəri Asif Ələmovdan 350 min ABŞ dolları alaraq, onun şirkətinə İqtisadi İnkişaf Nazirliyindən maliyyə yardımı veriləcəyini vəd edib.
Ələmov "GEN" MMC tikinti şirkətinin rəhbəri Elbrus Əliyevin rəhbərlik etdiyi dəstədə iştirakına görə məhkum edilib.
