Azərbaycan, Bakı, 3 sentyabr /Trend, müxbir H.Bağırov/
Bakı Apelyasiya Məhkəməsində Azərbaycanda öldürülən iş adamının işinə baxan hakimin dəyişdirilməsi ilə bağlı zərərçəkmiş tərəfin etirazı təmin edilib.
Bakı Apelyasiya Məhkəməsindən cümə günü Trend-ə verilən məlumata görə, "Qayğı mənzil xidmət" kooperativinin təsisçisi Xanbəyi Zamanovu xüsusi amansızlıqla qətlə yetirməkdə ittiham olunan Nemət Abdullayev və Samirə Əzimovanın işinə baxan Ağır Cinayətlərə Dair İşlər üzrə Məhkəmənin hakimi Ələkbər Quliyevin cinayət işini araşdırmasına etiraz edilməsi ilə bağlı vəsatətə baxılıb və qərar elan edilib.
Qərara görə, zərərçəkmiş tərəfin hakimin dəyişdirilməsi ilə bağlı etirazı təmin edilib və cinayət işinin başqa hakimə verilməsi barədə qərar qəbul edilib.
Ağır Cinayətlərə Dair İşlər üzrə Məhkəmədən Trend-ə verilən məlumata görə, cinayət işi məhkəmənin hakimi İlqar Murquzovun icraatına verilib və hazırlıq iclası sentyabrın 8-nə təyin edilib.
Təqsirləndirilən şəxslər Cinayət Məcəlləsinin xuliqanlıq niyyəti ilə qəsdən adamöldürmə (120.2.1), əmlakı qəsdən məhvetmə və ya zədələmə (186) və qanunsuz olaraq odlu silah gəzdirmə, saxlama (228) maddələri ilə ittiham ediliblər.
"Qayğı mənzil xidmət" kooperativinin təsisçisi, 52 yaşlı Xanbəyi Zamanov ötən il oktyabrın 25-də Balaxanı qəsəbəsində məişət tullantıları zavodunun yaxınlığında "Azsamand" markalı avtomobilində "Naqan" tipli tapança ilə öldürülüb, sonra isə yandırılıb.
Zamanovu qətlə yetirməkdə ittiham olunan Abdullayev və Əzimova saxlanılıb.
Ağır Cinayətlərə Dair İşlər üzrə Məhkəmənin hakimi Ələkbər Quliyevin vaxtından əvvəl fəaliyyətinə xitam verilib.
