Azərbaycan, Bakı, 2 oktyabr /Trend, müxbir M.Əliyev/
Bakı Təhsil Məlumat Mərkəzi şənbə günü Bakıda Beynəlxalq Təhsil Yarmarkası keçirib.
"Onuncu dəfə təşkil olunan təhsil yarmarkasında 20-dən artıq yerli və xarici təşkilat iştirak edir", - Mərkəzin proqramlarının koordinatoru İradə İsgəndərova jurnalistlərə bildirib.
Onun sözlərinə görə, sərginin məqsədi Azərbaycanın xaricdə təhsil almaq istəyən gənclərini mövcud olan proqramlar barədə məlumatlandırmaqdır.
Yarmarkada Azərbaycanda təhsillə məşğul olan aparıcı təşkilatlar - ABŞ səfirliyi, ACCELS, İREX, DAAD, The British Council, STİ-Azerbaijan, Newcastle Universiteti (Böyük Britaniya), Lazarski Universiteti (Polşa), Azərbaycan Diplomatik Akademiyası, American University in Bulgaria, AAA, GRBS, AEGEE və s. iştirak edib.