Azərbaycan, Bakı, 27 oktyabr /Trend, müxbir T.Hacıyev/
Azərbaycanda attestat ala bilməyən orta məktəb məzunları üçün mərkəzləşdirilmiş imtahan 2011-ci ilin fevral-aprel aylarında təşkil olunacaq. Trend-in Azərbaycan Təhsil Nazirliyinin rəsmi internet saytına istinadən verdiyi məlumata görə, bu barədə nazir Misir Mərdanov oktyarın 18-də əmr imzalayıb.
"2010/11-ci tədris ilində respublikanın bütün ümumtəhsil məktəblərində (Naxçıvan MR istisna olmaqla) və peşə liseylərində, ötən dərs illərində buraxılış imtahanlarından qeyri-kafi qiymət alan, müəyyən səbəblərdən ümumi orta və tam orta təhsil səviyyəsini bitirməyən və eksternat qaydasında imtahan vermək üçün müraciət edən şəxslər də əhatə olunmaqla, ümumi orta və tam orta təhsil səviyyələri üzrə buraxılış imtahanları mərkəzləşdirilmiş qaydada aparılsın", - əmrdə qeyd olunub.
Təhsil nazirinin əmrinə əsasən, ümumi orta təhsil səviyyəsi üzrə buraxılış imtahanı Azərbaycan dili və riyaziyyat, tam orta təhsil səviyyəsi üzrə buraxılış imtahanları Azərbaycan dili, ədəbiyyat, riyaziyyat, Azərbaycan tarixi, fizika, kimya, biologiya, coğrafiya və xarici dil fənlərindən keçiriləcək.
"Ümumtəhsil məktəblərində və peşə liseylərində ümumi orta və tam orta təhsil səviyyələri üzrə yoxlama imtahanları 2011-ci ilin 13 fevral - 17 aprel tarixlərində keçirilsin", - əmrdə qeyd olunub.