Azərbaycan, Bakı, 19 noyabr /Trend, müxbir Y.Ostapenko/
ABŞ və Avropa Azərbaycan hakimiyyəti tərəfindən gənc fəallar Emin Milli və Adnan Hacızadənin azadlığa buraxılmasını alqışlayır və tezliklə jurnalist Eynulla Fətullayevi də həbsdən azad etməyə çağırır.
Salyan rayon məhkəməsi cümə günü həbsdəki gənc Emin Millinin apelyasiya şikayətinə baxaraq onun həbsdən azad edilməsi barədə qərar verib. Cümə axşamı həbsdə olan digər fəal Adnan Hacızadə də azadlığa buraxılıb. Jurnalist Eynulla Fətullayev isə hələ də həbsdədir.
"Mən bu müsbət hadisəni məmnuniyyətlə qeyd edirəm. Azərbaycan hakimiyyəti bu tendensiyaya söykənməli və yubanmadan Fətullayevi həbsdən azad etməlidir", - ATƏT-in KİV azadlığı üzrə nümayəndəsi Dunya Miyatoviç bildirib.
"Ölkələrimizin cəmiyyətləri yazılan və deyilən sözlərdən qorxmamalıdırlar. Astanada ATƏT sammitinin yaxınlaşması ilə əlaqədar bütün üzv dövlətlər məhkum olunmuş və yeganə günahı öz fikrini ifadə etmək olan jurnalistləri həbsdən azad etməlidirlər", - Miyatoviç yayılan rəsmi məlumatda deyib.
Adnan Hacızadə digər gənc Emin Milli ilə birgə ötən il iyulun 8-də Bakının "Livan" restoranında baş verən insidentdən sonra tutulublar. Hücuma məruz qaldıqlarını və döyüldüklərini deyən gənclərə qarşı qəsdən sağlamlığa az ağır zərər vurma və xuliqanlıq maddələri üzrə ittiham irəli sürülüb. Adnan Hacızadəyə 2 il, Emin Milliyə isə 2 il 6 ay həbs cəzası kəsilib.
Almaniya parlamentində Cənubi Qafqaz ölkələri üzrə dostluq qrupunun həmsədri Viola fon Kramon da gənc fəalların azadlığa buraxılmasını alqışlayıb.
"Biz Adnan Hacızadə və Emin Millinin gözlənilmədən azadlığa buraxılmasından şadıq. Biz hər iki bloqeri tam reabilitasiya olunmaq cəhdlərinə görə dəstəkləyirik",- fon Kramonun bəyanatında deyilir.
O, Almaniya federal hökumətini və Aİ-ni Azərbaycanda gələcəkdə demokratik və Konstitusiya dəyərlərinin tərəqqisi üçün Azərbaycan hökuməti və Prezident İlham Əliyevlə əməkdaşlığa çağırıb.
2001-ci ildə demokratiya və insan haqlarının inkişafı üzrə ən iri beynəlxalq təşkilat Avropa Şurasına daxil olan Azərbaycan üzərinə müvafiq öhdəliklər götürüb.
ABŞ səfirliyi öz bəyanatında qeyd edib ki, Birləşmiş Ştatlar Hacızadə və Millinin işində çox maraqlıdırlar. Bunu həm Prezident Barak Obamanın, həm də dövlət katibi Klintonun açıq çağırışları sübut edir.
"Siyasi təsirlərdən azad müstəqil məhkəmə sistemi, eləcə də fəal vətəndaş cəmiyyətinin mövcudluğu müasir demokratik dövlətin əsasıdır. ABŞ eləcə də söz və toplaşma azadlığı sahəsində demokratik islahatların davam etdirilməsi üçün Azərbaycan hökuməti və xalqı ilə əməkdaşlığa sadiq qalır", - məlumatda deyilir.
"Gündəlik Azərbaycan" və "Realnıy Azərbaycan" qəzetlərinin baş redaktoru, böhtan, ağır və ya xüsusilə ağır cinayətdə ittiham etməklə böhtan atma (147.1, 147.2) maddələri ilə məhkum olunan Eynulla Fətullayev indiyədək həbsdədir.
Avropa İnsan Haqları Məhkəməsi bu il aprelin 22-də Fətullayevin həbsdən dərhal azad edilməsi ilə bağlı qərar qəbul edib. Qərara görə, Fətullayevə Azərbaycan hökuməti tərəfindən 28 min avro təzminat ödənilməlidir.
Ali Məhkəmənin cümə axşamı keçirdiyi Plenum iclasında qərar verilib ki, Eynulla Fətullayevin Cinayət Məcəlləsinin böhtan, ağır və ya xüsusilə ağır cinayətdə ittiham etməklə böhtan atma (147.1, 147.2) maddələri ilə məhkum olunmasına dair Ali Məhkəmənin 21 avqust 2007-ci il tarixli qərarı ləğv olunsun, həmin maddələr üzrə cinayət işinə xitam verilsin.
Fətullayev barəsində 2009-cu ilin dekabrında Cinayət Məcəlləsinin qanunsuz olaraq narkotik vasitələri, psixotrop maddələri və ya prekursorları hazırlama, istehsal etmə, əldə etmə, saxlama, daşıma, göndərmə və ya satma (234.1) maddəsi ilə cinayət işi açılmışdı. Bu ittihamla Fətullayev Qaradağ rayon məhkəməsinin hökmü ilə bu il iyun ayında 2 il 6 ay müddətinə azadlıqdan məhrum edilmişdi. Fətullayev bu hökmlə bağlı Bakı Apelyasiya Məhkəməsinə şikayət edib. İş üzrə məhkəmə baxışı noyabrın 22-nə təyin olunub.
